ნაციონალური მოძრაობის თავმჯდომარე, ნიკა მელია აცხადებს, რომ პარტიის პარლამენტში შესვლა-არშესვლასთან დაკავშირებით კონსულტაციებს იწყებს. მისი თქმით, ნაციონალურ მოძრაობაში ამ საკითხზე განსხვავებული პოზიციებია.

"პარლამენტში შესვლა-არშესვლასთან დაკავშირებით ხვალიდან გაიმართება ძალიან მჭიდრო კონსულტაციები პირველ რიგში, რა თქმა უნდა, ბლოკ ნაციონალური მოძრაობის ფარგლებში, უშუალოდ პარტიაში, მეგობრებთან. ასევე, არასაპარლამენტო პარტიის ლიდერებთან, მათ წარმომადგენლებთან; იმ პარტიებთან, რომლებიც პარლამენტში შევიდნენ. ამას დასჭირდება არაერთი დღე იმისათვის, რომ საბოლოო გადაწყვეტილება მივიღოთ [...]

ბუნებრივია, მეც მაქვს ამბივალენტური დამოკიდებულება რიგ საკითხებთან მიმართებაში. უბრალოდ, მგონია, რომ გადაწყვეტილება უნდა იყოს პრაგმატული, გადაწყვეტილება უნდა იყოს რაციონალური", — განაცხადა მელიამ.

ნიკა მელიამ რუსთავის #12 ციხე დღეს, 10 მაისს დატოვა. პროკურატურამ თბილისის საქალაქო სასამართლოს აღკვეთის ღონისძიების გირაოთი შეცვლის შუამდგომლობით 9 მაისს მიმართა.