თბილისის მერმა, კახა კალაძემ ე.წ. რიყის დოქების შემქმნელი იტალიური არქიტექტურული ბიურო Studio Fuksas-ის განცხადებაზე კომენტირებისას განაცხადა, რომ მათგან "არანაირი წერილი არ ყოფილა შემოსული და რომ ყოფილიყო, მას ექნებოდა შესაბამისი პასუხი მუნიციპალიტეტის შესაბამისი სამსახურისგან". მისივე თქმით, არც მუნიციპალიტეტს და არც ხელისუფლებას არანაირი კავშირი არ აქვს აღნიშნულთან დაკავშირებით, მას კერძო მესაკუთრე ჰყავს.

"არანაირი წერილი არ ყოფილა შემოსული [Studio Fuksas-იდან]. წერილი რომ ყოფილიყო შემოსული, მას ექნებოდა შესაბამისი პასუხი მუნიციპალიტეტის შესაბამისი სამსახურისგან.

...რიყის დოქებთან დაკავშირებით გადაწყვეტილება მიღებულია. ეს იყო სრულად უფუნქციო შენობა-ნაგებობა, აბსოლუტურად გაუმართლებელი, როდესაც თავის დროზე ათეულობით მილიონი ლარი დაიხარჯა, ყველანაირად უფუნქციო და, შესაბამისად, ის არის დღეს კერძო მესაკუთრეობაში. არც მუნიციპალიტეტს და არც ხელისუფლებას არანაირი კავშირი არ აქვს აღნიშნულთან დაკავშირებით. ეს არ არის მუნიციპალიტეტის საკუთრება, ეს არის კერძო საკუთრება და შეგიძლიათ, მათაც შეუძლიათ, თქვენც შეგიძლიათ, კერძო მესაკუთრესთან, მეპატრონესთან აწარმოოთ მოლაპარაკება. ჩვენთან რაც იყო მომართვიანობა დემონტაჟთან დაკავშირებით, ნებისმიერ შენობა-ნაგებობას, რომელსაც უტარდება დემონტაჟი, მას სჭირდება შეთანხმება არქიტექტურის სამსახურთან და ამ შემთხვევაშიც იგივე მოხდა. სხვა, ეხლა, ბიზნესსაქმიანობასთან დაკავშირებით, ვიღაცამ გადაიტანოს, სხვაგან დაიდგას, ეს არ შედის ჩვენს კომპეტენციაში. მას ჰყავს კერძო მესაკუთრე და უნდა აწარმოონ მოლაპარაკებები კერძო მესაკუთრესთან", — განაცხადა თბილისის მერმა კახა კალაძემ იტალიური არქიტექტურული ბიურო Studio Fuksas-ის განცხადებაზე კომენტირებისას.

შეგახსენებთ, რომ Dezeen-ში გავრცელებულ განცხადებაში იტალიური არქიტექტურული ბიურო Studio Fuksas აცხადებს, რომ გასული ერთი წლის განმავლობაში არაერთხელ სცადეს დაჰკავშირებოდნენ თბილისის ხელისუფლებასა და შენობის მფლობელებს, თუმცა პასუხი ვერ მიიღეს

"ბოლო რამდენიმე თვის განმავლობაში სტუდია არაერთხელ გამოვიდა ინიციატივით, საქართველოს ხელისუფლებასთან ერთად ემუშავა ალტერნატიული გადაწყვეტილებების მოძიებაზე, რომლებიც ამ სიმბოლური შენობის შენარჩუნებისა და ახალი დანიშნულებით გამოყენების შესაძლებლობას შექმნიდა, რითაც თავიდან ავიცილებდით, ჩვენი შეფასებით, ნაადრევ და შეუქცევად დემონტაჟს", — წერს იტალიური არქიტექტურული ბიურო Studio Fuksas.