თბილისის საქალაქო სასამართლოში ე.წ. საბოტაჟის საქმეზე ტიკ-ტოკერი ნინო ონიანი დაიკითხა, რომელსაც პროკურატურის ვერსიით, საქმისთვის მნიშვნელოვანი აუდიოჩანაწერი აქვს.

ადვოკატების ინფორმაციით, ონიანი სასამართლოში წარდგა, როგორც ჟურნალისტი. მისი განცხადებით, ის "ქართულ არხში" მუშაობს და ამის დამადასტურებელი ცნობაც წარადგინა.

ადვოკატ ომარ ფურცელაძის განცხადებით, მიუხედავად იმისა, რომ ონიანი სასამართლოს წინაშე ჟურნალისტის სტატუსით წარდგა — მისივე თქმით, სტატიებს წერს, მაგრამ არ აქვეყნებს, ხელფასიც ერიცხება ამ საქმიანობისთვის, მაგრამ არ იღებს.

ონიანმა სასამართლო პროცესზე განაცხადა, რომ წყარომ მიაწოდა რაციის ჩანაწერები, სადაც "მოლოტოვის კოქტეილების" დამზადებაზეა საუბარი. ონიანმა "პროფესიულად მინიჭებული უფლებით" წყაროს ვინაობა არ გაამხილა. მოწმის განცხადებით, აუდიოჩანაწერში პოლიტიკოსების ხმების ამოცნობა ვერ შეძლო.

"თქვა, რომ მიაწოდეს [ჩანაწერი], როგორც ჟურნალისტს, მაგრამ არ გამოუყენებია ეს ინფორმაცია. მეტიც, თქვა, რომ როგორც ჟურნალისტს არც ერთი სტატია და სიუჟეტი არ აქვს მომზადებული. მან განაცხადა, რომ მოუსმინა ამ ჩანაწერებს და მათში ასახული იყო დანაშაულებრივი ქმედებები. არ იცის, ვინ საუბრობს ამ ჩანაწერებში. რამდენჯერმე ვცადეთ, დაეკონკრეტებინა, რა მოისმინა. ერთადერთი, რაც მოისმინა — მისი თქმით, ჩანაწერებში ისმის "მოლოტოვის კოქტეილებზე". დაცვის მხარემ მას ჰკითხა, ხომ არ მოისმინა რომელიმე პოლიტიკოსის ხმა და იცნობდა თუ არა პოლიტიკოსებს, რომ მოესმინა. მან თქვა, რომ იცნობდა, მაგრამ პოლიტიკოსების ხმა იქ არ გაუგონია," — განაცხადა ადვოკატმა ქეთევან ჩომახაშვილმა.

ადვოკატ ომარ ფურცელაძის შეფასებით, სასამართლოში "ზღაპრის გმირი მიიყვანეს, რომელიც სტატიებს წერს, მაგრამ არსად აქვეყნებს და ინახავს". მისივე თქმით, დაცვის მხარის ადვოკატებმა ონიანის ჩვენებაზე სისხლის სამართლის გამოძიების დაწყება მოითხოვეს, რათა ცრუ ჩვენების მიცემის შემთხვევაში შესაბამისი ზომები იქნას მიღებული.

ადვოკატ არჩილ ჭავჭანიძის თანახმად, ნინო ონიანმა სასამართლო პროცესზე თქვა ისიც, რომ მას რაციის ჩანაწერები "არ მიუღია ჟურნალისტური საქმიანობის განხორციელებისთვის". ადვოკატის შეფასებით, ონიანი "აღმოჩნდა შუამავალი, რომელმაც გადასცა პროკურატურას აღნიშნული რაციის ჩანაწერი, რომელიც ამ მასალაში იყო ასახული".

მიუხედავად იმ უზუსტობებისა, რომლებზეც ადვოკატები საუბრობენ, წინასასამართლო სხდომის მოსამართლემ აღნიშნული მტკიცებულება მაინც დასაშვებად ცნო. ადვოკატების შეფასებით, ამ ჩანაწერს არაფერი აქვს საერთო მოცემულ სისხლის სამართლის საქმესთან და გაურკვეველია დეტალები, თუ როდის არის ჩაწერილი ან ვისი საუბარი ისმის მასში.

შეგახსენებთ, 14 ივლისს, თბილისის საქალაქო სასამართლოში ე.წ საბოტაჟის საქმეზე პარტია ნეიტრალური საქართველოს წევრები — ნანა კაკაბაძე, ბიძინა გიორგობიანი, ვატო შაქარიშვილი და ლევან ნიკოლაიშვილი დაიკითხნენ. დღეს სასამართლოს წინაშე წარდგა ამავე პარტიის წევრი გელა ნიკოლაიშვილი.

ადვოკატ ომარ ფურცელაძის განცხადებით, გამოკითხულმა პირებმა განაცხადეს, რომ სისხლის სამართლის დანაშაულში "აგენტურული ჯგუფის მხარდამჭერები და თანამოაზრეები" არიან: კაია კალასი, ურსულა ფონ დერ ლაიენი, მარტა კოსი, კელი დეგნანი და CIA.