კრემლისტური პარტია სოლიდარობა მშვიდობისთვის ლიდერი, რუსეთისა და საქართველოს ორმაგი მოქალაქე, ბიზნესმენი მამუკა ფიფია სოციალურ ქსელში რუსეთის საგარეო საქმეთა სამინისტროს სპეციალური წარმომადგენლის, მარია ზახაროვას ბრიფინგს ეხმაურება და წერს, რომ "მოსკოვში უკიდურესად დადებითად აფასებენ საქართველოს სუვერენულ კურსსა და პრემიერ კობახიძის ქმედებებს". მისივე თქმით, "რუსეთი ღიად უჭერს მხარს საქართველოს ხელმძღვანელობას მის სურვილში, დაიცვას საკუთარი ხალხის ინტერესები და არ მოემსახუროს სხვების გეოპოლიტიკურ შეკვეთებს".

"მოსკოვში უკიდურესად დადებითად აფასებენ საქართველოს სუვერენულ კურსსა და პრემიერ კობახიძის ქმედებებს. ზახაროვას თქმით, თბილისის სწრაფვა, გაატაროს დამოუკიდებელი, ეროვნული პოლიტიკა, კოლექტიური დასავლეთის მიერ პირდაპირ გამოწვევად აღიქმება. რუსეთი ღიად უჭერს მხარს საქართველოს ხელმძღვანელობას მის სურვილში, დაიცვას საკუთარი ხალხის ინტერესები და არ მოემსახუროს სხვების გეოპოლიტიკურ შეკვეთებს.

აშკარაა, რომ დასავლეთი სერიოზულ პროვოკაციას ამზადებს. მტრები, რომლებიც როგორც აქ, ისე იქ იმყოფებიან, ერთადერთ მიზანს ისახავენ — სრულად გაანადგურონ ყველაფერი, რაც ჩვენ გვაერთიანებს. მათ სურთ გაწყვიტონ ჩვენი საუკუნოვანი სულიერი კავშირები, გააუქმონ ეკონომიკური ურთიერთობები და მოსპონ უბრალო ადამიანური კონტაქტები ჩვენს ხალხებს შორის.

ჩვენ უნდა გვესმოდეს ეს საფრთხეები და არ უნდა მივცეთ გარე ძალებს უფლება, გამოიყენონ საერთაშორისო ინსტიტუტები ჩვენი ქვეყნის დესტაბილიზაციისთვის. ჩვენი პრიორიტეტია — შევინარჩუნოთ მშვიდობა ჩვენს რეგიონში", — წერს მამუკა ფიფია სოციალურ ქსელში.