2026 წელი ზენდეიასთვის საკმაოდ დატვირთული აღმოჩნდა და მსახიობმა ხუთ სხვადასხვა პროექტში მიიღო მონაწილეობა. 2026 წლის გაზაფხულზე თავდაპირველად ფილმი The Drama ვიხილეთ, რასაც Euphoria-ს მესამე სეზონიც მოჰყვა. ზენდეიას მონაწილეობით 2026 წლის ზაფხულში კიდევ ორ ფილმს ვიხილავთ: The Odyssey-სა და Spider-Man: Brand New Day-ს. წლის ბოლოს კი Dune: Part Three-ის პრემიერაც გველოდება.

თუმცა Dune ბოლო პროექტი არაა, რომელზეც ზენდეია ამ ეტაპზე მუშაობს. 2027 წელს მაყურებელი შრეკი 5-ს იხილავს, რომელშიც ზენდეია შრეკისა და ფიონას შვილს გაახმოვანებს. Entertainment-თან ინტერვიუში ზენდეიამ ისაუბრა იმის შესახებ, თუ რის გაკეთებას გეგმავს სარეკლამო ტურების დასრულების შემდეგ. "ლამის ყოველ წამს ახალ ადგილას ვარ და გონებაც სულ გაფანტულია. ეს ყველაფერი სახალისოა, მადლიერი ვარ და არც არაფერს შევცვლიდი, მაგრამ ხანდახან გჭირდება, რომ ცოტა ხნით უბრალოდ გაქრე", — განაცხადა მსახიობმა.

ფოტო: Getty

აღსანიშნავია, რომ ზენდეია 2026 წელს მინიმუმ $40 მილიონს გამოიმუშავებს. ზოგიერთი წყაროს მიხედვით, მარტო კინოდან მისი შემოსავალი $43 მილიონამდე ავა, რაც შავკანიანი მსახიობი ქალისთვის ერთ წელში რეკორდული თანხაა. ზენდეიას მილიონები ერთი პროექტით არ უშოვია — ეს ყველაფერი უამრავი ცნობილი ფილმის, პოპულარული სერიალებისა და ძვირადღირებულ ბრენდებთან გაფორმებული კონტრაქტების დამსახურებაა.

"ეს გრძელი წელი იქნება, მაგრამ მთავარი ისაა, რომ ყველაფრით ძალიან ვამაყობ. უბრალოდ, მართლა ძალიან მიყვარს ჩემი საქმე. ვფიქრობ, ამ ყველაფრის შემდეგ ცოტახნით დასვენება მომიწევს. თუმცა როგორც კი ვისვენებ, ჭკუიდან ვიშლები და ვფიქრობ ხოლმე, რომ მუშაობა მჭირდება", — ამბობს მსახიობი ELLE-თან ინტერვიუში.

სამსახიობო კარიერის მიღმა, ზენდეია მაღალი კლასის ბრენდების სახეა და მოდის ინდუსტრიასთან დაკავშირებული ბიზნესების მფლობელი თავადაცაა. ის სათავეში უდგას ისეთი მოდის სახლების სარეკლამო კამპანიებს, როგორებიცაა Bulgari, Valentino, Lancôme და Louis Vuitton. ბრენდებთან მრავალწლიანი კონტრაქტები მის შემოსავალს ყოველწლიურად რამდენიმე მილიონ დოლარს უმატებს იმ პერიოდშიც კი, როდესაც გადაღებები არ აქვს.