უნგრეთის ხელისუფლებამ პეტერ სიიარტოს წინააღმდეგ, რუსეთთან სავარაუდო კავშირების გამო, გამოძიება დაიწყო. ამის შესახებ ქვეყნის პრემიერმინისტრმა პეტერ მადიარმა განაცხადა.

"რამდენადაც ჩემთვის ცნობილია, გამოძიება უკვე დაწყებულია. როდესაც საზოგადოებისთვის გასაზიარებელი ინფორმაცია გვექნება, მას აუცილებლად გავასაჯაროებთ", — განაცხადა მადიარმა.

მას საქმის დეტალებზე არ უსაუბრია და აღნიშნა, რომ არ სურს წინასწარ განსაზღვროს გამოძიების შედეგები. მისი თქმით, საქმეში ფიგურირებს საიდუმლო დოკუმენტები, საგარეო საქმეთა სამინისტროს მასალები და სხვა ინფორმაცია.

ჟურნალისტების შეკითხვა სიიარტოს პარლამენტიდან წასვლისა და ჩინურ კომპანია BYD-ში გადასვლის შესახებ გავრცელებულ ინფორმაციას მოჰყვა. ახალ სამსახურში სიიარტო საგარეო ურთიერთობებსა და ბიზნესის ახალი მიმართულებების განვითარებას უხელმძღვანელებს.

ამ გადაწყვეტილებამ უნგრეთში ინტერესთა შესაძლო კონფლიქტთან დაკავშირებით კითხვები გააჩინა, რადგან უნგრეთის მთავრობა წლების განმავლობაში მნიშვნელოვან მხარდაჭერას უწევდა ჩინურ კომპანიას, ხოლო მედიის ცნობით, სიიარტო საგარეო საქმეთა მინისტრობის პერიოდში მის ინტერესებს ლობირებდა.

მადიარმა განაცხადა, რომ სიიარტოს BYD-ში დანიშვნა უნგრეთის მთავრობისა და ჩინური კომპანიის ურთიერთობებზე გავლენას არ მოახდენს, თუმცა, მისი თქმით, "ნორმალურ დემოკრატიაში" მსგავსი ვითარება წარმოუდგენელი იქნებოდა.

პრემიერმინისტრმა ასევე აღნიშნა, რომ ხელისუფლება BYD-სა და სიიარტოს შორის კავშირებსაც შეისწავლის.

გამოძიება The Washington Post-ში გამოქვეყნებული სტატიის შემდეგ დაიწყო. გამოცემა წერდა, რომ უკრაინაში სრულმასშტაბიანი ომის დაწყების შემდეგაც სიიარტო მჭიდრო კონტაქტს ინარჩუნებდა რუსეთის საგარეო საქმეთა მინისტრ სერგეი ლავროვთან და ევროკავშირის შეხვედრებს შორის შესვენებების დროს მას მოლაპარაკებების მიმდინარეობის შესახებ ინფორმაციას აწვდიდა.

მოგვიანებით, საერთაშორისო გამომძიებელთა ჯგუფმა, სავარაუდოდ, ფარული ჩანაწერების საფუძველზე მომზადებული მასალები გამოაქვეყნა. გამოცემის შეფასებით, ეს მასალები მიუთითებს, რომ უნგრეთის საგარეო საქმეთა მინისტრი კრემლის ინტერესების სასარგებლოდ მოქმედებდა, მათ შორის ევროკავშირის სანქციების სიებიდან რუსი ფიზიკური და იურიდიული პირების ამოღების ხელშეწყობით.

საპარლამენტო არჩევნების წინასაარჩევნო კამპანიის დროს მადიარი სიიარტოს უნგრეთისა და ევროპის ინტერესების საწინააღმდეგო მოქმედებაში ადანაშაულებდა და ამას "სამშობლოს ღალატს" უწოდებდა. ამავე პერიოდში იგი აცხადებდა, რომ ხელისუფლებაში მოსვლის შემთხვევაში ამ საქმეზე გამოძიებას დაიწყებდა.