მთავრობის მეთაურმა, ირაკლი კობახიძემ, საქართველოში აშშ-ის ყოფილი ელჩი, კელი დეგნანი "პოლიტიკური ტერორიზმის" აქტში დაადანაშაულა.

16 ივლისს, პროსამთავრობო ტელეკომპანია "იმედის" ეთერში, ირაკლი კობახიძემ აშშ-ის სახელმწიფო მდივნის, მარკო რუბიოს მიერ ორგანიზებულ მინისტერიალზე ისაუბრა, რომელიც "პოლიტიკური ტერორიზმის" წინააღმდეგ ბრძოლას ეძღვნება და მასში საგარეო უწყების ხელმძღვანელი, მაკა ბოჭორიშვილიც იღებს მონაწილეობას.

კობახიძის განმარტებით, "საქართველოს მაგალითი ერთ-ერთი საუკეთესოა, როდესაც საუბარი გვაქვს პოლიტიკურ ტერორიზმზე". მისივე განმარტებით, ის ფაქტი, რომ ქვეყანამ ბოლო ოთხი წლის განმავლობაში "რევოლუციის ხუთი ძალადობრივი ქმედება" გამოიარა, "სხვა არაფერია, თუ არა პოლიტიკური ტერორი".

"2020 წლის ბოლო პერიოდიდან მოყოლებული, ჩვენი ქვეყანა და მოსახლეობა მუდმივი პოლიტიკური ტერორის ქვეშ არის. რა პროცესებიც გამოვიარეთ — მხოლოდ რევოლუციის ხუთი მცდელობა — ეს სხვა არაფერია, თუ არა პოლიტიკური ტერორი. როდესაც ოთხი წლის განმავლობაში ქვეყანაში რევოლუციის ხუთი მცდელობა გაქვს, საიდანაც ოთხი ძალადობრივია, ეს სწორედ ამაზე მეტყველებს," — განაცხადა კობახიძემ.

კობახიძის განმარტებით, "გამჭვირვალობის კანონის" მიღება, "შეკრებებისა და მანიფესტაციების შესახებ" კანონში ცვლილებების შეტანა, ადმინისტრაციული ნორმების გამკაცრება და "სიძულვილთან ბრძოლის" რეგულაციების შემოღება პოლიტიკურ ტერორიზმთან ბრძოლას ემსახურება.

"აგენტურა მუდმივად [პოლიტიკური ტერორიზმით] არის დაკავებული. მათ თავის დროზე ოპოზიციასაც ვუწოდებდით, თუმცა დღეს მათ ამას ვერავითარ შემთხვევაში ვერ ვუწოდებთ — ეს არის ჩვეულებრივი უცხოური აგენტურა, რომელსაც აქვს ერთადერთი დავალება და დაკვეთა საქართველოს მოსახლეობა მუდმივი პოლიტიკური ტერორის ქვეშ ამყოფოს.

ჩვენ ბევრი ნაბიჯი გადავდგით ამ პოლიტიკური ტერორის აღსაკვეთად, მათ შორის, გამჭვირვალობის კანონი იყო სწორედ კანონი პოლიტიკური ტერორის წინააღმდეგ. სხვა ნაბიჯები, რომლებიც გადაიდგა — "შეკრებებისა და მანიფესტაციების შესახებ" კანონში ცვლილებები, სხვადასხვა ტიპის ადმინისტრაციული ნორმების გამკაცრება, მათ შორის, ის რეგულაციები, რომლებიც უკავშირდება სიძულვილის გავრცელებას — ეს ყველაფერი არის კანონმდებლობა და ნაბიჯები პოლიტიკური ტერორის წინააღმდეგ," — განაცხადა კობახიძემ.

შემდეგ კობახიძემ გაიხსენა შემთხვევა, როდესაც საქართველოში აშშ-ის ყოფილმა ელჩმა, კელი დეგნანმა, გამჭვირვალობის კანონის მიღების დღე შეაფასა, როგორც "შავი დღე დემოკრატიისთვის". კობახიძის თქმით, კელი დეგნანის ეს განცხადება "პოლიტიკური ტერორის აქტი" იყო და მან ქართველ ხალხს ამით "სამარცხვინო ტყუილი" აკადრა.

"თქვენ გახსოვთ, როდესაც ჩვენ გამჭვირვალობის შესახებ კანონს ვიღებდით, გამოვიდა წინა ადმინისტრაციის წარმომადგენელი, მაშინდელი ელჩი [კელი დეგნანი] და განაცხადა, რომ ეს იყო შავი დღე ქართული დემოკრატიისთვისო. ესეც პოლიტიკური ტერორის აქტი იყო.

ის განცხადება, რომელიც მაშინდელმა ამერიკის ელჩმა, კელი დეგნანმა გააკეთა, ასევე პოლიტიკური ტერორის აქტი გახლდათ, როდესაც მან სამარცხვინო ტყუილი აკადრა ქართველ ხალხს და ამით ხელოვნურად წაახალისა რევოლუციური პროცესები ჩვენს ქვეყანაში," — განაცხადა კობახიძემ.

"პოლიტიკურ ტერორზე" საუბრისას კობახიძემ ასევე მაგალითად მოიყვანა პარტია მოქალაქეების ყოფილი წევრი ალეკო ელისაშვილი, რომელსაც [გარკვეულ ქმედებაზე] თავისუფლების აღკვეთა მიესაჯა. მისი თქმით, უცხოელმა წარმომადგენლებმა ელისაშვილის მიმართაც კი "იკადრეს თანაგძნობის" გამოხატვა.

"ერთ-ერთი მაგალითი იყო ელისაშვილის შემთხვევაც, რომელმაც პირდაპირ ტერორისტული აქტი მოაწყო — სასამართლოს შენობის დაწვას ცდილობდა და მის მიმართაც კი იკადრეს თანაგრძნობის გამოხატვა. მათ შორის, ევროკავშირის ელჩმაც. რეალურად, თუ ჩავუღრმავდებით მის განცხადებას, მან ტერორისტულ აქტს გამოხატვის თავისუფლების გამოვლინება უწოდა," — განაცხადა კობახიძემ.

ცნობისთვის, ე.წ. საბოტაჟის საქმეზე პარტია ერთიანმა ნეიტრალურმა საქართველომ სასამართლო პროცესზე განაცხადა, რომ "აგენტურული ჯგუფის მხარდამჭერები და თანამოაზრეები" არიან: კაია კალასი, ურსულა ფონ დერ ლაიენი, მარტა კოსი, კელი დეგნანი და CIA.