საგარეო უწყების ხელმძღვანელმა, მაკა ბოჭორიშვილმა ამერიკის შეერთებული შტატების სახელმწიფო მდივნის, მარკო რუბიოს მიწვევით, ვაშინგტონში გამართულ "პოლიტიკური ტერორიზმის ხელახალი გააქტიურების შესახებ“ მინისტერიალში მიიღო მონაწილეობა, სადაც დამსწრე საზოგადოებას სიტყვით მიმართა.

მისი თქმით, "მინისტერიალში იყო ძალიან კარგი შესაძლებლობა საქართველოსთვის, კიდევ ერთხელ ყურადღება გაგვემახვილებინა სწორედ ჩვენს წინაშე მდგარ გამოწვევებზე, რადიკალიზმის პრობლემასა და პოლიტიკური ტერორიზმის იმ გამოხატულებაზე, რაც ჩვენ საქართველოში ვიხილეთ ბოლო წლებში".

ბოჭორიშვიილი აცხადებს, რომ პოლიტიკური ტერორიზმის საერთაშორისო დღის წესრიგში დაყენება მნიშვნელოვანი ინიციატივაა ამერიკის შეერთებული შტატების სახელმწიფო მდივნის მხრიდან. მისი თქმით, საქართველო თვალსაჩინო მაგალითია იმისა, თუ როგორ ხდება, უცხოური დაფინანსებით, რადიკალური ძალების წახალისება სახელმწიფო და დემოკრატიული ინსტიტუტების წინააღმდეგ.

"ჩვენ კარგი მაგალითი ვართ იმისა, თუ როგორ ხდება, განსაკუთრებით გარე დაფინანსებით, რადიკალური ძალების წახალისება სახელმწიფო ინსტიტუტებისა და დემოკრატიული ინსტიტუტების წინააღმდეგ. სწორედ ეს საკითხები არის მნიშვნელოვანი, რაც უნდა აღელვებდეს საერთაშორისო საზოგადოებას", — აღნიშნა ბოჭორიშვილმა.

მისი განცხადებით, მინისტერიალის ფარგლებში კოლეგა მინისტრებს შორის საინტერესო დისკუსია გაიმართა, სადაც განსაკუთრებული ყურადღება დაეთმო ტერორიზმისა და ექსტრემიზმის საკითხებს.

"საინტერესო დისკუსია შედგა კოლეგა მინისტრებს შორის. ყურადღება მნიშვნელოვან საკითხებზე იყო გამახვილებული. რა თქმა უნდა, როდესაც ტერორიზმსა და ექსტრემიზმზე ვსაუბრობთ, მნიშვნელოვანია სხვადასხვა იდეოლოგიური მიმართულება. სწორედ ამ კუთხით, ჩვენი მონაწილეობა ამ მინისტერიალში იყო ძალიან კარგი შესაძლებლობა საქართველოსთვის, კიდევ ერთხელ ყურადღება გაგვემახვილებინა სწორედ ჩვენს წინაშე მდგარ გამოწვევებზე, რადიკალიზმის პრობლემასა და პოლიტიკური ტერორიზმის იმ გამოხატულებაზე, რაც ჩვენ საქართველოში ვიხილეთ ბოლო წლებში", — განაცხადა საგარეო საქმეთა მინისტრმა.