იტალიური არქიტექტურული ბიურო Studio Fuksas ე.წ. რიყის დოქების დაგეგმილი დემონტაჟის შეჩერებას და შენობისთვის ახალი ფუნქციის მოძიებას ითხოვს. მათ განცხადებას გამოცემა Dezeen ავრცელებს.

Studio Fuksas აცხადებს, რომ გასული ერთი წლის განმავლობაში არაერთხელ სცადა დაჰკავშირებოდნენ თბილისის ხელისუფლებასა და შენობის მფლობელებს, თუმცა პასუხი ვერ მიიღო.

"ბოლო რამდენიმე თვის განმავლობაში სტუდია არაერთხელ გამოვიდა ინიციატივით, საქართველოს ხელისუფლებასთან ერთად ემუშავა ალტერნატიული გადაწყვეტილებების მოძიებაზე, რომლებიც ამ სიმბოლური შენობის შენარჩუნებისა და ახალი დანიშნულებით გამოყენების შესაძლებლობას შექმნიდა, რითაც თავიდან ავიცილებდით, ჩვენი შეფასებით, ნაადრევ და შეუქცევად დემონტაჟს.

საერთაშორისო აღიარებისა და არაერთი ჯილდოს მქონე არქიტექტურული ნამუშევრის დაკარგვა კულტურული თვალსაზრისით მნიშვნელოვანი დანაკარგი იქნება", —აცხადებენ Studio Fuksas-ში.

სტუდიის განცხადებით, შენობა საზოგადოებრივი სახსრებით აშენდა და მისი დემონტაჟი დამატებით საბიუჯეტო ხარჯებსაც მოითხოვს, ნაცვლად იმისა, რომ შეფასდეს მისი ხელახალი გამოყენებისა და განახლების პოტენციალი.

"საკონცერტო დარბაზის დანგრევა ასევე ნიშნავს, რომ თბილისი დაკარგავს უნიკალურ კულტურულ სივრცეს — კლასიკური მუსიკის საკონცერტო დარბაზსა და თანამედროვე ხელოვნების მნიშვნელოვან ცენტრს, რომელსაც ყოვლისმომცველი რეაბილიტაციის პროგრამის ფარგლებში მომავალ თაობებსაც შეეძლო მომსახურებოდა", — ნათქვამია განცხადებაში.

მათი თქმით, ამ წინადადებებს არანაირი პასუხი არ მოჰყოლია.

Studio Fuksas აკრიტიკებს როგორც შენობის დემონტაჟის გადაწყვეტილებას, ისე ქალაქის ხელისუფლებისა და ამჟამინდელი მფლობელების მხრიდან დიალოგის ნაკლებობას. რადგან ამ დრომდე არ გამოცხადებულა, რა აშენდება რიყის საკონცერტო დარბაზის ადგილას, თუმცა წარსულში ამ ტერიტორიაზე სასტუმროს მშენებლობის იდეა განიხილებოდა.

"სამოც წელზე მეტი ხნის პროფესიული საქმიანობის განმავლობაში ეს პირველი შემთხვევაა, როდესაც Studio Fuksas-ს მისი ერთ-ერთი პროექტის დემონტაჟი ემუქრება ისე, რომ ალტერნატიული გზების განხილვაში მონაწილეობის მისაღებად არც კი მიუწვევიათ.

არც საჯარო უწყებებს და არც სხვა დაინტერესებულ მხარეებს, ჩვენი არაერთგზის მზადყოფნის მიუხედავად, სტუდიასთან თანამშრომლობის სურვილი არ გამოუხატავთ. Studio Fuksas კატეგორიულად ეწინააღმდეგება როგორც შენობის დემონტაჟს, ისე მისი მომავლის შესახებ ღია დიალოგის არარსებობას.

თბილისს ჯერ კიდევ აქვს შესაძლებლობა, დაუსრულებელი პროექტი განახლების, ინოვაციისა და საერთაშორისო ღიაობის სიმბოლოდ აქციოს. ნუ დავკარგავთ ამ შესაძლებლობას", — წეროა განცხადებაში.

Studio Fuksas, რომელიც არქიტექტორებმა მასიმილიანო და დორიანა ფუქსასებმა დააარსეს, იტალიის ერთ-ერთი ყველაზე ცნობილი არქიტექტურული ბიუროა. სტუდიის ბოლო პროექტებს შორისაა მონაკოს სანაპიროზე დაგეგმილი Sogenannte "ვერტიკალური პარკი".