მიხაილო ფედოროვმა უკრაინის თავდაცვის მინისტრის თანამდებობის დატოვება 15 ივლისს დაადასტურა. ამას წინ უძღოდა პოსტიდან ქვეყნის პრემიერმინისტრის, იულია სვირიდენკოს გათავისუფლება. სამთავრობო ცვლილებები უკრაინაში პრეზიდენტ ვოლოდიმი ზელენსკის ინიციატივით ხორციელდება.

გადაწყვეტილება თავად ფედოროვმაც დაადასტურა სოციალურ ქსელში და აღნიშნა, რომ მისთვის "დიდი პატივი იყო უკრაინელი ხალხისთვის თავდაცვის მინისტრად მსახურება".

ვოლოდიმირ ზელენსკის გადაწყვეტილებას, უკრაინაში პროტესტი მოჰყვა. როგორც უკრაინული მედია წერს, კიევში, პრეზიდენტის ოფისთან, ისევე როგორც ქვეყნის სხვადასხვა ქალაქში, მიხაილო ფედოროვის მხარდამჭერი აქციები იმართება.

აქციის მონაწილეებს ხელში პლაკატები უჭირავთ სლოგანებით: "ფედოროვი — თავდაცვის მინისტრი", "არ შეეხოთ იმას, რაც მუშაობს", "ხელები შორს ფედოროვისგან", "დააბრუნეთ ფედოროვი" და "ძალაუფლება კვლავ ხალხს ეკუთვნის". მოქალაქეები ასევე სკანდირებენ: "სირცხვილია", "ფედოროვი თავდაცვის მინისტრია".

ამ დროისთვის საპროტესტო გამოსვლებისთვის არც ფედოროვს და არც პრეზიდენტის ოფისს არ უპასუხია.

რადაში ხუთშაბათს კენჭი უნდა ეყარათ თავდაცვის მინისტრის პოსტზე წარდგენილი ახალი კანდიდატურისთვის — იჰორ კლიმენკოსთვის, რომელიც ამჟამად შინაგან საქმეთა სამინისტროს ხელმძღვანელობს.

უკრაინაში ზოგი ფედოროვის გადაყენებას მასსა და კონსერვატიულად მოაზროვნე გენერალ ოლექსანდრ სირსკის შორის არსებულ უთანხმოებას უკავშირებს, სხვები კი ყურადღებას ამახვილებენ იმაზე, რომ მან ვერ შეძლო საკმარისად სწრაფად ემოქმედა ჯარში მობილიზაციის რეფორმის კუთხით.

35 წლის ფედოროვი უკრაინის თავდაცვის მინისტრად 2025 წლის იანვარში დაინიშნა. მას სამინისტროს მუშაობის გამოცოცხლებას, კორუფციასთან ბრძოლას და ფრონტის ხაზზე ეფექტიანობის გასაუმჯობესებლად მონაცემთა ანალიზის დანერგვას მიაწერენ.

დრონებზე, მაღალტექნოლოგიურ შეიარაღებასა და შესყიდვებზე ორიენტირება ფედოროვმა თავდაცვის მინისტრის პოსტზე დანიშვნის შემდეგაც განაგრძო.

საქმიანობის დაწყების პირველსავე დღეებში მან SpaceX-ის დამფუძნებელს, ილონ მასკს სთხოვა, რუსეთისთვის Starlink-ის თანამგზავრების გამოყენების შესაძლებლობა შეეზღუდა, რათა მათ დრონებით თავდასხმები ვეღარ განეხორციელებინათ. ამ ნაბიჯმა მნიშვნელოვნად შეაფერხა რუსეთის მოქმედებები და წინსვლა ფრონტის ხაზზე.