ნარკოდანაშაულის ბრალდებით დაკავებულ ბრიტანეთის მოქალაქეს, ომის ვეტერან მეთიუ როი დესმონდს საპროცესო შეთანხმება გაუფორმდა — დესმონდი სასამართლო დარბაზიდან გაათავისუფლეს.

სასამართლომ ბრიტანელი ომის ვეტერანი ნარკოდანაშაულში დამნაშავედ ცნო, მას 100 000 ლარის (დაახლოებით 28 ათასი ფუნტი სტერლინგი) ჯარიმის გადახდა დაეკისრა, საქართველოდან გაძევება მიესაჯა და ქვეყანაში შემოსვლა 20 წლით აეკრძალა. პროკურატურის საპროცესო შეთანხმების პირობები მოსამართლე ნინო გალუსტაშვილმა დააკმაყოფილა.

როგორ აღმოჩნდა ბრიტანელი ომის ვეტერანი 3 თვით გლდანის ციხეში?

49 წლის მეთიუ როი დესმონდი სხვადასხვა დროს ბრიტანეთის შეიარაღებულ ძალებში მსახურობდა და სამხედრო მისიებში მონაწილეობდა, მათ შორის ერაყსა და ავღანეთში. დესმონდმა სწორედ აქ მიიღო ხერხემლის ტრავმა, რის შემდეგაც ექიმის მიერ გამოწერილ მედიკამენტებს მოიხმარს.

ომის ვეტერანმა მოტოციკლეტით 25 ქვეყანა მოიარა და თურქეთში ვიზიტის შემდეგ, სახმელეთო საზღვრით საქართველოს სტუმრობაც ჰქონდა დაგეგმილი. თუმცა დესმონდი საზღვარზევე დააკავეს მას შემდეგ, რაც მას ექიმის დანიშნული ტკივილგამაყუჩებლები აღმოუჩინეს, კერძოდ — "პრეგაბალინი", "ბუპრენორფინი" და "კოდეინი".

ომის ვეტერანის ადვოკატებმა "რადიო თავისუფლებას" განუცხადეს, რომ საზღვარზე პრობლემა მხოლოდ "ფორმალობების დაუცველობამ" წარმოქმნა. კერძოდ, საქართველოს კანონმდებლობით, საზღვარზე მედიკამენტის მოხმარების ცნობა (ფორმა №100) აპოსტილით უნდა იყოს დამოწმებული.

მეთიუ როი დესმონდი საქართველოს სისხლის სამართლის კოდექსის 262-ე მუხლის პირველი და მეორე ნაწილებით გაასამართლეს, რაც დიდი ოდენობით ნარკოტიკული და ფსიქოაქტიური ნივთიერებების უკანონოდ შემოტანას გულისხმობს და 8-დან 12 წლამდე პატიმრობას ითვალისწინებს.

მიუხედავად იმისა, რომ დაცვის მხარემ უწყებას მალევე წარუდგინა შესაბამისი საბუთები, რომლებიც ადასტურებდა, რომ ომის ვეტერანი მედიკამენტებს სამკურნალოდ იყენებდა, პროცესი 3 თვეს გაგრძელდა. ამ პერიოდში ომის ვეტერანს ციხეში ხერხემლის პრობლემები გაუმწვავდა.

ადვოკატებმა საქმის მასალებს ასევე დაურთეს ყველა ის ჯილდო, რომელიც ომის ვეტერანს მიღებული აქვს.

საპროცესო შეთანხმების მთავარი პირობა დანაშაულის აღიარებაა. მიუხედავად იმისა, რომ დესმონდმა სასამართლო პროცესზე დანაშაული "აღიარა", მისი ოჯახი და ადვოკატები განმარტავენ, რომ ისინი კვლავ არ მიიჩნევენ დესმონდს დამნაშავედ და მრავალწლიანი პატიმრობის საფრთხეს საპროცესო შეთანხმების გაფორმება ამჯობინეს.

"დაცვის მხარე ფიქრობს, რომ მას დანაშაული არ ჩაუდენია, თუმცა, ფორმალურად, ასეთი პრაქტიკა სასამართლოს არ აქვს… ჩვენ რომ ვიდავოთ, შეიძლება მოვიგოთ ეს საქმე, თუმცა ამას 100 პროცენტით ვერ ვიტყვით. ამიტომ, ვინაიდან მას ჯანმრთელობის პრობლემები აქვს და ვინაიდან 8-დან 12 წლამდე პასუხისმგებლობა ელოდებოდა, აღარ ვრისკავთ. პირობები, რომლებიც ბრალდების მხარემ შემოგვთავაზა, მისაღებია. ამ ადამიანისთვის მთავარი თავისუფლებაა, ამიტომ ვეღარ გავიგებთ, რა მოხდებოდა, ამ საკითხზე რომ გვედავა," — განაცხადა ადვოკატმა ჯაბა კოჭლამაზაშვილმა "რადიო თავისუფლებასთან" საუბრისას.

დესმონდს სასამართლო დარბაზიდან გათავისუფლების შემდეგ, ეზოში მიგრაციის სამსახური დახვდება, რომელიც მის ქვეყნიდან გაძევებას უზრუნველყოფს. სასამართლო პროცესებს ესწრებოდნენ დესმონდის ოჯახის წევრებიც, რომლებიც საგანგებოდ ჩამოვიდნენ საქართველოში, რათა ომის ვეტერანი სამშობლოში დაებრუნებინათ.