ახალქალაქის მუნიციპალიტეტის სოფელ აზავრეთში საკუთარ სახლში შუახნის კაცი გარდაცვლილი იპოვეს, მას ჭრილობა ყელის არეში ცივი იარაღით ჰქონდა მიყენებული — ინფორმაციას "სამხრეთის კარიბჭე" ავრცელებს.

შემთხვევა 14 ივლისს მოხდა. მედიაგამოცემის ცნობით, შსს-მ მომხდარზე გამოძიება სსკ-ს 108-ე მუხლით მიმდინარეობს, რაც განზრახ მკვლელობას გულისხმობს.

"ჩაუტარდა ექსპერტიზა, ყელის არეში ცივი იარაღით ჰქონდა დაზიანება მიყენებული. არ ვიცი მკვლელობაა, თუ თვითმკვლელობა მიმდინარეობს გამოძიება," — განუცხადა ლევან სამხარაულის სახელობის სასამართლო ექსპერტიზის ახალციხის ბიუროს ექსპერტმა, დავით მერაბიშვილმა "სამხრეთის კარიბჭეს".

რეგიონული ონლაინ მედია jnews.ge წერს, რომ სოფელში სხვადასხვა, ურთიერთგამომრიცხავი ინფორმაცია ვრცელდება: ნაწილი მკვლელობის ვერსიაზე საუბრობს, ნაწილი კი თვითმკვლელობაზე. მათივე ცნობით, 55 წლის კაცი სოფელში მეუღლესთან ერთად ცხოვრობდა.