სვანეთში 35 წლის წინ მომხდარი არასრულწლოვნის სისტემატური გაუპატიურების საქმეზე შსს-მ გამოძიება დაიწყო.

ნატა ვიბლიანი სოციალურ ქსელში პირველად 3 თვის წინ გამოჩნდა. ემიგრანტმა ქალმა ვიდეომიმართვაში ისაუბრა იმაზე, რომ 90-იან წლებში სვანეთში, სოფელ სგურიშში, მასზე მისი ნათლიის ძმა და მისი ნათესავები სისტემატურად ძალადობდნენ.

ვიბლიანმა თავისი ისტორია "ვეძებ"-ის დამფუძნებლის, თამუნა მუსერიძის პოდკასტში მოჰყვა და მოძალადე კაცების ვინაობაც დაასახელა.

ვიბლიანის თქმით, მეზობელმა მასზე ძალადობა მას შემდეგ დაიწყო, რაც მამა გარდაეცვალა. ქალი იხსენებს, რომ კაცი მას 9 წლის ასაკიდან სისტემატურად აუპატიურებდა და ამის შესახებ მთელმა სოფელმაც იცოდა.

"ძროხას ვწველიდი, იქ შემოვიდა. თავზე გადამისვა ხელი, ნუ გეშინიაო... ტკივილისგან გავითიშე, რამდენი ხანი ვეგდე იმ ბოსელში, იმ მდგომარეობაში, არ მახსოვს. გონზე რომ მოვედი, ეს ადამიანი იქ აღარ იყო. დამტოვა და გაიქცა," — იხსენებს ქალი "რადიო თავისუფლებასთან" საუბრისას.

ვიბლიანის თქმით, კაცი მას სიცოცხლის მოსპობით ემუქრებოდა და იარაღის მუქარით აშინებდა.

"დაუმორჩილებელი ბავშვი ვიყავი. სანამ იარაღს არ აიღებდა და პირში არ ჩამჩრიდა პისტოლეტის ლულას, მანამდე ვერ მიმორჩილებდა და ასეთ მდგომარეობაში მაუპატიურებდა. ჩემს უმცროს ძმებს უშვერდა იარაღს და ამბობდა, რომ ხმას თუ ამოვიღებდი, იმათ დახოცავდა.

ცხენზე გამომაბა და სადაც ზაფხულობით საბალახოდ გადაგვყავდა საქონელი, იქამდე მათრია ცხენზე მიბმული, რომ ვინმესთვის არ მეთქვა სიმართლე," — უყვება ქალი "რადიო თავისუფლებას".

რამდენიმე წელიწადში ქალი დაორსულდა და 13-14 წლის ასაკში შვილიც გააჩინა. მან, სავარაუდოდ, 1997 წელს იმშობიარა.

ვიბლიანი პოდკასტში იხსენებს, რომ ის იარაღით დააშინეს, რათა ბავშვის მამობა სხვა პირისთვის გადაებრალებინა და ოჯახის ახლობელი არ ემხილებინა.

"[დაორსულების შემდეგ] იარაღით შემაშინეს — უნდა მეთქვა, რომ ბავშვი იყო სხვისი — კონკრეტული ბიჭის. არ ვიცი, ის ბიჭი როგორ იყო შეშინებული. მე 14 წლისაც არ ვიყავი," — ამბობს ვიბლიანი.

ვიბლიანი იხსენებს, რომ მას ოჯახის წევრები მცენარეებისგან დამზადებულ წამალს ასმევდნენ, რამაც "კინაღამ მოკლა". მალევე 14 წლის მოზარდმა იმშობიარა და დღემდე არ იცის, რა ბედი ეწია მის შვილს.

"ძირები ბიძაჩემმა მოიტანა. ხარშავდნენ ამ ძირებს. კინაღამ მომკლეს, ერთი კვირის განმავლობაში მასმევდნენ. მერე წამიყვანეს საავადმყოფოში. საავადმყოფოში გამიკეთეს ნემსები. მერე ვიმშობიარე, ბავშვის მხოლოდ ხმა გავიგონე და თმა დავინახე, კარებში რომ გაჰყავდათ. ექთანმა იკითხა, ბავშვს რა ვუყოო. ექთანმა იცოდა, რომ ბავშვი მოსაშორებელი იყო, ჩვეულებრივი მშობიარობა არ იყო. მაინც იკითხა. იქ გასცეს პასუხი, მოკალიო. არ ვიცი, ბავშვი ცოცხალია თუ მკვდარია. ხმა მესმოდა, თმაც ჰქონდა. ალბათ 7 თვის ბავშვზეა ლაპარაკი. მე ძალიან დიდი მუცელი მქონდა," — იხსენებს ვიბლიანი.

ვიბლიანი სექსუალურ ძალადობაში სხვა თანასოფლელებსაც ადანაშაულებს. მისი თქმით, მასზე სექსუალურად ნათლიის ძმის ნათესავებიც ძალადობდნენ.

"სამივენი ამ კაცის ნათესავები არიან. მათ სწორედ მისი ჩარევით გამაუპატიურეს, მისი სიბინძურის დასაფარად, რომ ხმა ვერ ამომეღო ვერასდროს, როგორც ქალს, რომ ვერასდროს მეთქვა, რომ მე ამდენმა კაცმა გამაუპატიურა," — ყვება ქალი.

ვიბლიანის განცხადებით, 90-იან წლებში ის და მისი ოჯახი, მოგვარეების ნაწილის ზეწოლის გამო, იძულებული გახდა სოფლიდან გადასახლებულიყო.

"ნოდარიშარები შეგროვდნენ და გადაწყვიტეს, რომ ჩვენი იქ ცხოვრება აღარ შეიძლებოდა. მოგვცეს 22 ათასი ლარი [სოფელში არსებული სახლის სანაცვლო თანხა] და დედასთან და და-ძმებთან ერთად წავედით ზუგდიდში. სოფელში ძალიან კარგი სახლი დავტოვეთ და ზუგდიდში აღმოვჩნდით გაუსაძლის პირობებში. მაშინ ჯერ კიდევ არასრულწლოვანი ვიყავი, მქონდა თვითმკვლელობის მცდელობაც, მაგრამ გადავრჩი," — იხსენებს ქალი.

ნატა ვიბლიანი ემიგრაციაში იმყოფება. ჰყავს შვილი და სამი თვის შვილიშვილი. ქალი "რადიო თავისუფლებასთან" ამბობს, რომ მიუხედავად ქვეყნის ფარგლებს გარეთ ყოფნისა, მას ოჯახის წევრებისა და თანასოფლელების მხრიდან ანგარიშსწორების მაინც ეშინია.

ქალის ინტერესებს იურისტი მარიამ ბარსონიძე დაიცავს. 15 ივლისს ადვოკატმა უკვე მიმართა შინაგან საქმეთა სამინისტროს, საქმეს კი დაერთო მისი, როგორც ადვოკატის, ორდერი.

ადვოკატი "რადიო თავისუფლებასთან" საუბრისას ამბობს, რომ, პირველ რიგში, ის საგამოძიებო უწყებისგან ნატა ვიბლიანის გამოკითხვას მოითხოვს. ის უკვე ესაუბრა საქმის გამომძიებელს.

"დეტალურად უნდა მოხდეს იმ საზარელი ფაქტების აღწერა, რომელთა შესახებაც ნატა ვიბლიანი ჰყვება. ამის შემდეგ მას აუცილებლად უნდა მიანიჭონ დაზარალებულის სტატუსი, რის შემდეგაც მას, როგორც დაზარალებულს, და მე, როგორც დაზარალებულის ადვოკატს, გვექნება სრული უფლება, რომ საქმის მასალებს სრულყოფილად გავეცნოთ," — განაცხადა ადვოკატმა.