ირაკლი კობახიძის მიერ საქართველოში აშშ-ის ყოფილი ელჩის, კელი დეგნანის "პოლიტიკური ტერორიზმის" აქტში დადანაშაულება ბრიფინგზე სამართალდამცავი ორგანოების კოორდინაციის საკითხებში სახელმწიფო მინისტრმა, მამუკა მდინარაძემ შეაფასა. მისი თქმით, არავინ "ეკითხებოდა კელი დეგნანს ან ვინმე სხვას, რომ კანონი შეეფასებინათ, როგორც "დემოკრატიის შავი დღე.

მისი თქმით, "ქვეყნის ოფიციალურმა წარმომადგენელმა, ჯერ ერთი, მინიშნებაც კი არ უნდა გააკეთოს ისეთი, რომელიც აშკარად გამოხატავს ქვეყნის შიდა საქმეებში ჩარევას".

"ხალხი, პირდაპირი გაგებით, ლამის ცემაზე გადმოვიდა. ოთახებში იყო მუჭების და ხელების ბრახუნი მაგიდებზე, ომის მოთხოვნით. და თქვენ მხოლოდ "იმის გამო" ამას ეძახით... მაშინ დავყოლოდით რაღაც ნებებს, არ დავკონკრეტდები ამ მოცემულ შემთხვევაში, და შევსულიყავით, გვეომა და მერე ვიძახებდით, რომ ტრილიონებს მოგვცემენო, მოგვცემდნენ რამდენიმე მილიარდს სესხად და გაუბედურებული ეკონომიკა, დახოცილი ადამიანები – ეს გვექნებოდა. და ნიკა გვარამიასავით მერე ტრილიონებს მოგვცემენო და ვილაპარაკებდით, რა კარგია, რომ ხალხი დაგვეხოცა, მაგრამ ტრილიონებს მოგვცემენ, მოგვცემდნენ რამდენიმე მილიარდს, ისიც სესხად და სისხლად გამოგვადენდნენ, როგორც იტყვიან ხოლმე ჩვენთან ძალიან ხშირად, ყველაზე მძაფრად რომ უნდათ გადმოცემა რაღაც მოვლენის.

"დემოკრატიის შავი დღე", ვინ ეკითხებოდათ კელი დეგნანს ან ვინმე სხვას, რაღაცა კანონის შეფასებას "დემოკრატიის შავ დღედ"? დიახ, ამერიკის შეერთებული შტატების წინა ადმინისტრაციის წარმომადგენლები ასე უხეშად და ტერორიზმთან გათანაბრებული ფორმით, ვერბალური ტერორიზმთან გათანაბრებული ფორმით ერეოდნენ საქართველოს და არა მხოლოდ საქართველოს შიდა საქმეებში. კი, წინა ადმინისტრაციას ვადანაშაულებ, პოლიტიკურ ტერორს ახორციელებდა საქართველოში, დიახ", — თქვა მდინარაძემ.

ტვ პირველის ჟურნალისტის კითხვაზე, საქართველოს მთავრობის მეთაურის შეფასება რამდენად შეუწყობს ხელს საქართველოსა და აშშ-ის ურთიერთობების ნორმალიზებას, მდინარაძემ განაცხადა, რომ "არაფორმალური გავლენა "დიფ სთეითის" იფიქრებენ, რომ კვლავ ძალაშია, "თუ ეს ხარვეზები ქვეყნებს შორის ურთიერთობაში აშშ-ის მხრიდან არ გამოსწორდა".

"როდესაც ჩვენ ვსაუბრობთ ნორმალიზებაზე და არა იმაზე, რომ ყველაფერი კარგად არის, და როდესაც ვსაუბრობდით "დიფ სთეითზე", როდესაც ჩვენ ვსაუბრობდით არაფორმალური გავლენების მოქმედებებზე, მათ შორის ადმინისტრაციებთან მიმართებაში, მათ შორის საკუთრივ და კერძოდ ამერიკის შეერთებული შტატების ადმინისტრაციასთან მიმართებით, ჩვენ ყოველთვის ვამბობდით და არ მოვრიდებივართ, რომ გავლენა არაფორმალური, "დიფ სთეითის" და ასე შემდეგ სხვადასხვა ჯგუფების, კვლავ ვიფიქრებთ, რომ ძალაშია – შეიძლება ნაკლებად, მაგრამ მაინც – თუ ეს ხარვეზები ქვეყნებს შორის ურთიერთობაში მათი მხრიდან არ გამოსწორდა. ჩვენ ამას ვამბობთ, არ მოვრიდებივართ", — განაცხადა მდინარაძემ.

გუშინ, 16 ივლისს, მთავრობის მეთაურმა, ირაკლი კობახიძემ, საქართველოში აშშ-ის ყოფილი ელჩი, კელი დეგნანი "პოლიტიკური ტერორიზმის" აქტში დაადანაშაულა.