"რადიო თავისუფლება" წყაროებზე დაყრდნობით იტყობინება, რომ ჩეჩნეთის ლიდერის, რამზან კადიროვის, 18 წლის ვაჟი, ადამი, ავტოკატასტროფაში მოყვა და მძიმე მდგომარეობაშია. ოპოზიციასთან დაკავშირებულმა Telegram-ის არხმა NIYSO-მ ასევე გაავრცელა ინფორმაცია სავარაუდო ავარიის შესახებ და დასძინა, რომ არსებობს დაუდასტურებელი ინფორმაცია, რომ ავარიაში მასთან ერთად შესაძლოა ჩეჩენი UFC-ის ჩემპიონი, ხამზათ ჩიმაევიც მოჰყვა.

"რადიო თავისუფლებას" ორმა წყარომ განუცხადა, რომ 18 წლის კადიროვი გროზნოს საავადმყოფოში მკურნალობს.

NIYSO-მ და სხვა წყაროებმა განაცხადეს, რომ ჩიმაევი შესაძლოა გარდაცვლილიყო, რაც უკვე გავრცელდა რუსულ მედიაში.

"საავადმყოფომდე მისასვლელი გზები დაკეტილია, რადგან ადამი იქ გადაიყვანეს. ის უგონო მდგომარეობაშია და რეანიმაციაშია, ამბობენ ისინი. ჩვენ დანამდვილებით არ ვიცით, რა მდგომარეობაშია კადიროვის ვაჟი", – განუცხადა წყარომ "რადიო თავისუფლებას".

თუმცა, NIYSO-მ ხაზგასმით აღნიშნა, რომ ჩიმაევის ინციდენტში მონაწილეობის შესახებ ინფორმაცია არ დადასტურებულა და რომ დაშავებულებში შესაძლოა სხვა მაღალი რანგის ჩეჩენი ჩინოვნიკის შვილი იყოს. სხვა წყაროები, მათ შორის სახელმწიფო წყარო, აცხადებენ, რომ ჩიმაევი დუბაიში იმყოფება.

ავარიის შესახებ ინფორმაციის გავრცელებიდან მალევე, სახელმწიფო საინფორმაციო საშუალება Chechnya Today-მ ჩიმაევის გარდაცვალების შესახებ გავრცელებული ჭორები უარყო.

მათ მის გარემოცვასთან დაახლოებულ წყაროზე დაყრდნობით განაცხადეს, რომ ის "დუბაიში იმყოფება. თავს კარგად გრძნობს".

მათ არ უხსენებიათ ადამ კადიროვის ჰოსპიტალიზაციის შესახებ ინფორმაციას.

ადამ კადიროვი 2025 წელს 18 წლის გახდა და მამის მემკვიდრეთა რიგებში სასურველ კანდიდატად ითვლება.

18 წლის ასაკში ადამს უკვე რამდენიმე მნიშვნელოვანი საჯარო და სამთავრობო თანამდებობა ეკავა. ის მამამისის უსაფრთხოების დეპარტამენტს ხელმძღვანელობს, ჩეჩნეთის უშიშროების საბჭოს მდივნის თანამდებობას იკავებს, ზედამხედველობს ჩეჩნეთის შინაგან საქმეთა სამინისტროს და გუდერმესში მდებარე რუსეთის სპეციალური დანიშნულების უნივერსიტეტს, ასევე თავდაცვის სამინისტროს ბატალიონს.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.