"მე სასტიკად არ მიყვარს უცენზუროდ გამოხატული საჯარო კრიტიკა. იცით, რომ ეს არასოდეს გამიკეთებია. მაგრამ ის რაც ახლა ხდება, არის ცენზურა" — ორგანიზაცია "კანონის უზენაესობის ცენტრის" დამფუძნებელი ლონდა თოლორაია სოციალურ ქსელში შსს-ში სიძულვილის ენისა და შეურაცხმყოფელი გამოხატვის მონიტორინგისთვის ახალი სამმართველოს შექმნას ეხმაურება.

თოლორაია წერს, რომ ადამიანის უფლებათა დაცვის დეპარტამენტი თავდაპირველად მოწყვლადი ჯგუფების დასაცავად შეიქმნა, თუმცა დღეს, მისი შეფასებით, "კრიტიკისაგან ხელისუფლების დაცვის დანაყოფად" იქცა.

"ვერასდროს წარმოვიდგენდი, რომ შინაგან საქმეთა სამინისტროს ადამიანის უფლებათა დაცვის დეპარტამენტი, რომელიც 2018 წელს შევქმენით მოწყვლადი ჯგუფების (ქალების, ბავშვების, უმცირესობების) უფლებების დასაცავად, ბოლოს გადაიქცეოდა კრიტიკისაგან ხელისუფლების დაცვის დანაყოფად.

და მაინც, რადგან გადაწყვეტილია და იქმნება, გთხოვთ, მონიტორინგი ხელისუფლების წარმომადგენლების მიერ განსხვავებული აზრის წარმომადგენლების მიმართ გამოყენებული ლექსიკით/ენით დაიწყოთ.

მე სასტიკად არ მიყვარს უცენზუროდ გამოხატული საჯარო კრიტიკა. იცით, რომ ეს არასოდეს გამიკეთებია. მაგრამ ის რაც ახლა ხდება, არის ცენზურა. მეტი არაფერი," — წერს ლონდა თოლორაია სოციალურ ქსელში.

ცნობისთვის, სამართალდამცავ სტრუქტურებს შორის კოორდინაციის საკითხებში სახელმწიფო მინისტრის, მამუკა მდინარაძის ბრიფინგიდან ცნობილი გახდა, რომ შინაგან საქმეთა სამინისტროში შეიქმნება სამმართველო, რომელიც საჯარო სივრცეში სიძულვილის ენას, შეურაცხმყოფელ კამპანიებსა და აგრესიულ კომუნიკაციას მონიტორინგს გაუწევს და შესაბამის სამართლებრივ რეაგირებას იქონიებს. ეს შეეხება ნებისმიერი ტიპის საჯარო კომუნიკაციას.

მისი განცხადებით, ირაკლი კობახიძის ინიციატივით დებატების სივრცის გახსნა პირველი მნიშვნელოვანი ნაბიჯი იყო, ხოლო ახლა მორიგ მნიშვნელოვანი ეტაპი იქნება, რომელიც შსს-ში ახალი სამმართველოს შექმნას გულისხმობს.