მთავრობის მეთაური ირაკლი კობახიძე აზერბაიჯანის რესპუბლიკის პრეზიდენტ ილჰამ ალიევს შეხვდა. ვიზიტის ფარგლებში გაფორმდა ორმხრივი საკოორდინაციო საბჭოს პროტოკოლი, რომლის თანახმად ბაქო-თბილისი-ყარსის ახალი სარკინიგზო მონაკვეთი სრულ ექსპლუატაციაში შევა და 6-წლიანი პაუზის შემდეგ, 26 მაისიდან ბაქო-თბილისის მატარებელი ყოველდღიურ მიმოსვლას აღადგენს. ამის შესახებ ინფორმაციას მთავრობის ადმინისტრაცია ავრცელებს.

მათი ცნობით, განსაკუთრებული ყურადღება დაეთმო სავაჭრო-ეკონომიკურ კავშირებს და ეკონომიკური თანამშრომლობის მთავრობათაშორისი კომისიის როლს.

შეხვედრის დასრულების შემდეგ, ირაკლი კობახიძისა და ილჰამ ალიევის თანდასწრებით, ორ ქვეყანას შორის ენერგეტიკისა და ტრანსპორტის სექტორში მნიშვნელოვან შეთანხმებათა პაკეტს მოეწერა ხელი.

ასევე, გაფორმდა 20-წლიანი მთავრობათაშორისი შეთანხმება საქართველოსა და აზერბაიჯანს შორის ელექტროენერგიის მიწოდებისა და სატრანზიტო მიმოსვლის ძირითად პირობებზე; 20 წლით გახანგრძლივდა აზერბაიჯანიდან გაზის ყიდვა-გაყიდვის 2003 წელს გაფორმებული ხელშეკრულება.

"ძალიან მნიშვნელოვანია ის შეთანხმებები, რომლებიც გაფორმდა. ეს არის ჩვენს ურთიერთობებში საეტაპო მნიშვნელობის შეთანხმებები, რომლებიც დაკავშირებულია ეკონომიკური პარტნიორობების გაღრმავებასთან და ენერგეტიკული თანამშრომლობის გაღრმავებასთან. ეს შეთანხმებები უკავშირდება გაზის იმპორტს და გაზის ტრანზიტს. ამ კუთხით განსაკუთრებით ხაზგასასმელია ის, რომ 20-წლიანი ხელშეკრულება, სოციალურ გაზთან დაკავშირებით, გადაგრძელდა 20 წლით. ამისათვის გაფორმდა ახალი ხელშეკრულება და ამას ექნება განსაკუთრებული მნიშვნელობა ჩვენი ქვეყნის ენერგეტიკული უსაფრთხოებისთვის.
[...]
ასევე მნიშვნელოვანი შეთანხმება გაფორმდა, რომელიც უკავშირდება ბაქო— თბილისი — სუბსის მილსადენს. ეს მილსადენი რეალურად გაჩერებული იყო ბოლო 3 წლის განმავლობაში — არ ოპერირებდა, რის გამოც ქვეყანა ვერ იღებდა პოტენციურ შემოსავალს. ახალი შეთანხმების საფუძველზე, აზერბაიჯანულ მხარესთან ერთად, ჩვენ უზრუნველვყოფთ ამ მილსადენის ამოქმედებას. ბუნებრივია, მილსადენი არის ჩვენი საკუთრება და რჩება, რა თქმა უნდა, საქართველოს საკუთრებაში.
[...]
ასევე შევთანხმდით ბაქო — თბილისი — ყარსის რკინიგზასთან დაკავშირებით ყველა დეტალი შეთანხმდა და ძალიან მალე უკვე გაეშვება რკინიგზის ეს მონაკვეთი. საქართველოს რკინიგზა უზრუნველყოფს ოპერირებას. აზერბაიჯანულ მხარესთან ერთად, შექმნილი იქნება ერთობლივი საწარმო და ეს პროექტიც არის ძალიან მნიშვნელოვანი ჩვენი დაკავშირებადობის გაძლიერების კუთხით...", — განაცხადა ირაკლი კობახიძემ ჟურნალისტებთან საუბრისას.