15 მაისს, ევროპის საბჭოს მინისტრთა კომიტეტმა უკრაინის წინააღმდეგ ჩადენილი დანაშაულის შემსწავლელი სპეციალური ტრიბუნალის შექმნის პროცესში მნიშვნელოვანი გადაწყვეტილება დაამტკიცეს.

"შეხვედრის ფარგლებში 37-მა ქვეყანამ დაამტკიცა უკრაინის წინააღმდეგ აგრესიის დანაშაულის შემსწავლელი სპეციალური ტრიბუნალის მმართველი კომიტეტის შექმნის შესახებ ნაწილობრივი შეთანხმება — სპეციალური ტრიბუნალის მესამე დამფუძნებელი დოკუმენტი," — იუწყება უკრაინის საგარეო საქმეთა სამინისტრო.

უკრაინის საგარეო საქმეთა მინისტრმა, ანდრიი სიბიჰამ განაცხადა, რომ "დღეს უკვე გადალახულია უკან დასაბრუნებელი წერტილი — სპეციალური ტრიბუნალი სამართლებრივ რეალობად იქცა", თუმცა აღნიშნა, რომ ეს მხოლოდ დასაწყისია სამართლიანობის გზაზე.

მან ასევე აღნიშნა, რომ ტრიბუნალში მონაწილე ქვეყნების წრე კიდევ გაფართოვდება.

"პუტინს ყოველთვის სურდა ისტორიაში შესვლა. და ეს ტრიბუნალი მას ამაში დაეხმარება. ის ისტორიაში კრიმინალის სტატუსით შევა. და არა მხოლოდ ის. პუტინი, შოიგუ, გერასიმოვი, ბორტნიკოვი, ზოლოტოვი, მედვედევი, პატრუშევი, ლუკაშენკო და სხვები. დღეს ყველამ მათ ჰააგისკენ მიმავალი ბილეთი მიიღო," — განაცხადა მინისტრმა.

საგარეო საქმეთა სამინისტრომ ხაზგასმით აღნიშნა, რომ გაფართოებული ნაწილობრივი შეთანხმება, რომელიც მმართველი კომიტეტის შექმნას ეხება, განსაზღვრავს ტრიბუნალის ადმინისტრაციულ და მმართველობით საფუძვლებს და შექმნის დამატებით მექანიზმებს ტრიბუნალის მიმართ რეგიონთაშორისი მხარდაჭერის გასაფართოებლად.

შეთანხმებას შეეძლებათ შეუერთდნენ როგორც ევროპის საბჭოს წევრი სახელმწიფოები, ისე მესამე ქვეყნები.