ქეიტ ბლანშეტმა კანის კინოფესტივალზე სიტყვით გამოსვლისას სინანულით აღნიშნა, რომ ჰოლივუდში #MeToo მოძრაობა "ძალიან სწრაფად დასრულდა".

მსახიობმა, რომელიც ჰოლივუდში გენდერული თანასწორობის აქტიური მხარდამჭერია, განაცხადა: "ბევრ გავლენიან ადამიანს შეუძლია საკუთარი პლატფორმის გამოყენება უსაფრთხოდ საუბრისა და ისტორიის მოსაყოლად. როდესაც რიგითი ქალი ამბობს "me too"-ს, ამას რატომ არ ექცევა ყურადღება?".

2018 წელს, როდესაც ბლანშეტი კანის კინოფესტივალის ჟიურის პრეზიდენტი იყო, წითელ ხალიჩაზე გამართულ საპროტესტო აქციაში მიიღო მონაწილეობა. ის ფესტივალის სასახლის კიბეებზე 81 ქალთან ერთად გამოჩნდა — ეს რიცხვი იმ ქალ რეჟისორებს განასახიერებდა, რომელთა ფილმებიც კანის კინოფესტივალის მთელი ისტორიის განმავლობაში ძირითად პროგრამაში მოხვედრილა. შედარებისთვის, იმავე პერიოდში კონკურსზე 1866 კაცი რეჟისორი იყო წარდგენილი.

გადასაღებ მოედანზე დღესაც ყოველდღე ვითვლი ხალხს. ყოველ დილით იქ 10 ქალია და 75 კაცი — განაცხადა ბლანშეტმა.

"როდესაც ერთფეროვან გარემოში მუშაობ, ეს საბოლოოდ ყველასთვის მოსაწყენი ხდება და, ვფიქრობ, სამუშაო პროცესზეც ახდენს გავლენას," — განაგრძო მსახიობმა.

იმ წელს, როდესაც ბლანშეტი ჟიურის პრეზიდენტი იყო, კანის კინოფესტივალის ძირითად პროგრამაში შერჩეული 21 ფილმიდან მხოლოდ 3 იყო ქალი რეჟისორის მიერ გადაღებული, რაც კრიტიკის მიზეზი გახდა. მაშინ ბლანშეტმა ფესტივალი დაიცვა და აღნიშნა, რომ ცვლილებები "ერთ ღამეში არ ხდება".

კანის კინოფესტივალზე ჯულიანა მურმაც ისაუბრა გადასაღებ მოედნებზე არსებულ გენდერულ უთანასწორობაზე. მისი თქმით, ბოლო ათწლეულში მდგომარეობა შედარებით გაუმჯობესდა.

ფოტო: Getty Images

მურმა გაიხსენა შემთხვევა, როდესაც 2016 წელს სულ ორი ქალი იყო გადასაღებ მოედანზე: "მახსოვს, არც ისე დიდი ხნის წინ, ერთ-ერთ გადასაღებ მოედანზე ქალები მხოლოდ მე და ოპერატორის მესამე ასისტენტი ვიყავით. ეს ის პერიოდია, როდესაც ჰილარი კლინტონმა არჩევნები წააგო და ორივე განადგურებულები ვიყავით. მაშინ ვუთხარი: 'ირგვლივ მიმოიხედე, აქ მხოლოდ ჩვენ ვართ'. მას შემდეგ გადასაღებ ჯგუფებში ქალების რაოდენობა ნამდვილად გაიზარდა. ჩემი კარიერის დასაწყისში გადასაღებ მოედანზე ქალის დანახვა იშვიათი მოვლენა იყო," — აღნიშნა ჯულიანამ.