საქართველოს ბანკი სუხიშვილების მთავარი სპონსორია.

“სუხიშვილები პასუხისმგებლობისა და თავისუფლების სინთეზია. იქ ვისწავლე, რომ ყველაზე დიდი წარმატება საკუთარ თავზე გამარჯვებაა“, — ამბობს თამრი ხურცილავა, რომლისთვისაც მოცეკვავეობა მხოლოდ პროფესია არასდროს ყოფილა. მისთვის ეს არის შინაგანი რიტმი, დისციპლინა, მუდმივი ძიება და გზა, რომელიც არასდროს ჩერდება.

ამ ბლოგში გიამბობთ თამრი ხურცილავაზე. ადამიანზე, რომელმაც ბავშვობის ოცნება ყოველდღიურ რეალობად აქცია და დღეს იმავე მუხტს უკვე ახალ თაობას გადასცემს.

ცეკვა 5 წლის ასაკში დაიწყო. როგორც თავად იხსენებს, ძალიან მალე მიზნად დაისახა სუხიშვილების ანსამბლში ცეკვა. არ აცდენდა რეპეტიციებს, მუდმივად ვითარდებოდა და შეუჩერებლად განაგრძობდა გზას, მანამ სანამ ოცნება რეალობად არ აქცია და სახელმწიფო ანსამბლის წევრი არ გახდა.

“უწყვეტმა მოძრაობამ იმ სცენამდე მიმიყვანა, სადაც პირველად სუხიშვილების ცეკვა ვნახე და სადაც ჩემი ბავშვობის ოცნება დაიბადა. ხუთი წლის ვიყავი, როცა დარბაზში შევაბიჯე და მაშინვე ვიგრძენი, რომ რაღაც დიდის ნაწილი გავხდი. ეს იყო კავშირი, რომელიც ჩემში მუდამ არსებობდა. იმ დღეს კი უბრალოდ ფორმა მიიღო“, — იხსენებს ის.

კითხვაზე, რას ნიშნავს მისთვის წარმატება, თამრი გვპასუხობს: “ეს არის სიყვარული, რომელსაც ვიღებ მაყურებლისგან, მოსწავლეებისა და გარშემომყოფებისგან. ხოლო მისი საიდუმლო ორ სიტყვაში ეტევა: დისციპლინა და სურვილი“.

ბრენდად ქცეული ანსამბლის წევრობა, სიამაყესთან ერთად, კიდევ უფრო დიდ პასუხისმგებლობასთან ასოცირდება, განსაკუთრებით მაშინ, როცა სცენის მიღმაც გცნობენ, და შენს თითოეულ ნაბიჯს ყურადღებით ადევნებენ თვალს.

რა გასაკვირია, რომ ჩვენი ბლოგის გმირი, მრავალწლიანი გამოცდილების შემდეგაც კი სცენაზე გასვლის წინ ყოველთვის ნერვიულობს. თუმცა, საკმარია ცეკვის დაწყება და დაძაბულობას თავისუფლება ანაცვლეს, ყოველი ილეთი შინაგან რიტმს ირეკლავს.

დღეს თამრი ხურცილავა საკუთარ გამოცდილებას ახალ თაობას უზიარებს. თავისი ენერგიისა და ცეკვისადმი სიყვარულის გადაცემას ცდილობს ბავშვებისთვის, რომლებიც იმ გზას გადიან, 5 წლის თამრიმ რომ გაიარა. შესაბამისად, ახლა თავად ცდილობს იყოს მაგალითი და შთაგონებისა და წყარო.

“მოსწავლეებს სულ ვეუბნები, რომ არასოდეს გაჩერდნენ, გააკეთონ ისე, როგორც გამოსდით. როცა მიზანი და შენი საქმე გიყვარს, ეს უკვე თავისით გაძლევს ძალას და აღარ გაჩერებს“, — აღნიშნავს თამრი.

მისთვის ცეკვა ყოველთვის მოძრაობაზე მეტს ნიშნავდა. ეს იყო დისციპლინა, შინაგანი სიმტკიცე და რწმენა, რომ დანებება არასდროს არის გამოსავალი. ამიტომაც ცდილობს, ეს დამოკიდებულება გადასცეს მათ, ვინც ამ პროფესიაში პირველ ნაბიჯებს დგამს.

“რაც უნდა მოხდეს, თავი მაღლა, თვალები მიზანზე და მოძრაობა მხოლოდ წინ“. — ამბობს თამრი და ამ სიტყვებით აერთიანებს ყველაფერს, რაც მისი პროფესიული გზის საფუძველია: შრომას, მიზანს, მუდმივ წინსვლასა და არ გაჩერებას.

უფრო მეტისთვის, ნახეთ საქართველოს ბანკის ვიდეო.