ნიუ-იორკში მასობრივი მკვლელობის დაგეგმვაში ეჭვმიტანილ საქართველოს მოქალაქეს, მიხეილ ჩხიკვიშვილს 15 წლით თავისუფლების აღკვეთა მიესაჯა. ამის შესახებ ინფორმაციას აშშ-ს იუსტიციის სამინისტრო ავრცელებს. ჩხიკვიშვილი ცნობილი, იგივე "კაპიტანი ჯალათი", საერთაშორისო რასობრივად მოტივირებული ძალადობრივი ექსტრემისტული დაჯგუფება "მანიაკი მკვლელობების კულტის" ლიდერია. დაჯგუფება ასევე ცნობილია როგორც "მანიაკები: მკვლელობის კულტი" (Maniacs: Cult of Killing, MKY, MMC და MKU).

"მანიაკების მკვლელობის კულტის" ლიდერი ჩხიკვიშვილი მოუწოდებდა უდანაშაულო მშვიდობიანი მოსახლეობის, მათ შორის ბავშვების მკვლელობისკენ და გეგმავდა შეერთებულ შტატებში ებრაულ თემებსა და რასობრივ უმცირესობებზე თავდასხმასა და მათ დატერორებას. მაგალითად, ჩხიკვიშვილმა სცადა სავარაუდო თანამშრომლის დაქირავება, რათა სანტა კლაუსის ფორმა ჩაეცვა და უმცირესობების წარმომადგენლების ბავშვებისთვის მოწამლული ტკბილეული დაერიგებინა. დღევანდელი განაჩენი ჩვენ ქუჩებს ურჩხულს მოაშორებს და ჩვენს თემებს, სულ მცირე, დროებით დაიცავს", — განაცხადა ეროვნული უსაფრთხოების გენერალური პროკურორის თანაშემწემ ჯონ ა. აიზენბერგმა.

აშშ-ს იუსტიციის სამინისტროს ცნობით, "მანიაკური მკვლელობის კულტი" ნეონაცისტური იდეოლოგიის მიმდევარია და ხელს უწყობს ძალადობას რასობრივი უმცირესობების, ებრაული თემის და სხვა ჯგუფების მიმართ, რომლებსაც ის "არასასურველად" მიიჩნევს. დაახლოებით 2021 წლის სექტემბრიდან ჩხიკვიშვილმა MKY-ის წევრებში მანიფესტი სახელწოდებით "მოძულეთა სახელმძღვანელო" გაავრცელა, რომელიც ხალხს მოუწოდებს მასობრივი ძალადობის ჩადენისკენ, მათ შორის სკოლებში სროლებისკენ.

2022 წლის ივნისში ჩხიკვიშვილი ნიუ-იორკის შტატის ქალაქ ბრუკლინში გაემგზავრა. 2022 წლის ივლისიდან დაწყებული, დაჯგუფების წევრებს, ძირითადად Telegram-ის საშუალებით, MKY-ის სახელით ძალადობრივი სიძულვილით მოტივირებული დანაშაულებისა და სხვა ძალადობრივი აქტების ჩადენისკენ მოუწოდებდა. მათივე ცნობით ჩხიკვიშვილმა მსოფლიოს მასშტაბით მრავალი თავდასხმა და მკვლელობა წაახალისა.