გერმანიის პოლიციამ ვეფხვი, რომელიც ხანდაზმულ მომვლელს თავს დაესხა, ცეცხლსასროლი იარაღით მოკლა. ინფორმაციას Deutsche Welle ავრცელებს. მათი ცნობით, ვეფხვი ლაიფციგთან ახლოს მდებარე კერძო ვოლიერიდან გაიქცა.

მედიის ცნობით, ცხოველი ცნობილ მწვრთნელს, კარმენ ზანდერს ეკუთვნოდა. გავრცელებული ინფორმაციით, მის მზრუნველობაში რვა ვეფხვია. ოფიციალური პირების განცხადებით, სხვა ცხოველები არ გაქცეულან. ვეფხვი თავს 73 წლის მამაკაცს დაესხა, რომელიც ვოლიერში მომვლელად მუშაობდა. დაშავებული მამაკაცი სამკურნალოდ საავადმყოფოში გადაიყვანეს.

გამოცემა Bild-ის ცნობით, ცხოველი გაქცევიდან 30 წუთზე ნაკლებ დროში მოკლეს.

ამ ინციდენტს შკეუდიცის ვეფხვების ბანაკის შესახებ დებატები მოჰყვა. ერთ-ერთმა მოწმემ, რომელიც ამტკიცებდა, რომ იცნობდა ვეფხვის მფლობელს, საინფორმაციო სააგენტო DPA-ს განუცხადა, რომ ცხოველები "ზედმეტად პატარა ვოლიერში იყვნენ" და გადაადგილებისთვის ძალიან შეზღუდული სივრცე ჰქონდათ.

ზანდერი, რომელსაც "ვეფხვების დედოფალს" უწოდებდნენ, ცხოველებს წვრთნიდა და მთელი ევროპის მასშტაბით შუებს მართავდა. თუმცა, როგორც Die Zeit წერს, მას ცხოველებისადმი მოპყრობის გამო სამართლებრივი პრობლემები შეექმნა. სხვა საკითხებთან ერთად, მას ბრალად ედება ვეფხვების შოუს სათანადო ნებართვის გარეშე გამართვა, რის გამოც ლაიფციგის პროკურატურამ გამოძიება დაიწყო.