2026 წლის 17 მაისს, ვაშინგტონში, ეროვნული პარკის მოედანზე, აშშ-ის 250 წლის იუბილესთან დაკავშირებული ფართომასშტაბიანი რელიგიური შეკრება — "250 წლის ხელახალი გადააზრება: ლოცვის, დაფასების და მადლიერების ეროვნული იუბილე" (Rededicate 250: A National Jubilee of Prayer, Praise & Thanksgiving) გაიმართა.

ღონისძიება აშშ-ის პრეზიდენტის, დონალდ ტრამპის მიერ მხარდაჭერილი საჯარო-კერძო ორგანიზაცია Freedom 250-ის მიერ იყო ორგანიზებული. Freedom 250 ამ ზაფხულს, ქვეყნის საიუბილეო თარიღამდე, კიდევ არაერთ აქციას გეგმავს. შეკრებაზე სიტყვით გამოვიდნენ დონალდ ტრამპის ადმინისტრაციის ოფიციალური პირები, კონსერვატორი ქრისტიანი ლიდერები და მუსიკოსები.

NBC NEWS-ის ცნობით, ანალიტიკოსები აღნიშნავენ, რომ პრეზიდენტი დონალდ ტრამპი და მისი ადმინისტრაცია სულ უფრო აქტიურად იყენებენ რელიგიურ სიმბოლოებს საჯარო სივრცეში. ამის მაგალითია ოვალურ კაბინეტში გამართული ლოცვის სცენები და იუსტიციის დეპარტამენტის სპეციალური სამუშაო ჯგუფი, რომელიც ანტიქრისტიანული მიკერძოების წინააღმდეგ შეიქმნა.

ამავე კონტექსტში მოჰყავთ ტრამპის სოციალურ ქსელში გამოქვეყნებული (და მოგვიანებით წაშლილი) პოსტიც, სადაც ის ქრისტეს მსგავს მხსნელად იყო გამოსახული, თუმცა თავად ტრამპმა მოგვიანებით განმარტა, რომ მისი აზრით, ფოტოზე ის ექიმის როლში იყო.