"ამ დროს ქართველ მსახიობებს აღარც ადგილი, აღარც სცენა და, ცხადია, აღარც საშუალება ეძლევათ, რომ რუსთაველის თეატრი "დაიქირაონ!" — წერს საქართველოს მეხუთე პრეზიდენტი, სალომე ზურაბიშვილი სოციალურ ქსელში რუსთაველის თეატრში გამართულ ღონისძიებასთან დაკავშირებით, რომელიც რუსეთის თეატრალური ხელოვნების ინსტიტუტის სტუდენტებმა გამართეს.

"ამ დროს ქართველ მსახიობებს აღარც ადგილი, აღარც სცენა და, ცხადია, აღარც საშუალება ეძლევათ, რომ რუსთაველის თეატრი "დაიქირაონ"! ნუთუ მართლა ყველაფერი იყიდება?" — წერს ზურაბიშვილი.

რუსთაველის თეატრში გამართულ წარმოდგენაზე ინფორმაცია თავდაპირველად სოციალური სამართლიანობის ცენტრის ხელმძღვანელმა, თამთა მიქელაძემ გაავრცელა.

რუსთაველის თეატრში რუსეთის თეატრალური ინსტიტუტის სტუდენტებმა წარმოდგენა გამართეს, რომელიც 9 მაისს მიეძღვნა. რუსთაველის თეატრის დირექტორი გია თევზაძე "ტვ პირველთან" სატელეფონო ინტერვიუში აცხადებს, რომ რუსთაველის თეატრის სცენა იჯარით გააქირავეს, მაქსიმალური თანხა აიღეს და მომავალშიც თუ იქნება შესაძლებლობა, ასევე მოიქცევიან. მისივე თქმით, თეატრს არ სჭირდება კულტურის სამინისტროსგან თანხმობა, სცენა რომ კონკრეტულ პიროვნებებს და მსახიობებს მიაქირაოს.