ქართული ოცნების დებუტატი, ირაკლი ქადაგიშვილი აცხადებს, რომ საზოგადოებაში შეურაცხმყოფელი და შუღლის გამომწვევი განცხადებები არ უნდა იქცეს ნორმად და მედია პოლარიზაციის წინააღმდეგ ბრძოლაში წამყვან როლს უნდა ასრულებდეს. ამის შესახებ ინფორმაციას პირველი არხი ავრცელებს.

ქადაგიშვილმა ჟურნალისტებთან საუბრისას აღნიშნა, რომ კანონი ყველას შეეხება. მისი თქმით, საზოგადოება "ბევრ უმსგავსობას" შეაჩვიეს, რის გამოც "წესიერი გზის ჩვენება" ხშირად უარყოფით რეაქციას იწვევს.

"უკმაყოფილებას არ უნდა იწვევდეს ის, რომ შეურაცხმყოფელი, ლანძღვის, დაპირისპირების და შუღლის გამომწვევი განცხადებები არ იყოს ჩვენი ცხოვრების თანმდევი და სტანდარტი.

კანონი ყველას შეეხება. სჯობს, კარგი ინიციატივების მხარდამჭერები ვიყოთ, ვიდრე კარგ ინიციატივებს ცუდი მაგალითების მოშველიებით ტორპედირება გავუკეთოთ. ისე შეგვაჩვიეს ბევრ უმსგავსობას, რომ წესიერი გზის ჩვენება როცა ხდება, ეს უარყოფით რეაქციას იწვევს ხოლმე. უკმაყოფილებას არ უნდა იწვევდეს ის, რომ შეურაცხმყოფელი, ლანძღვის, დაპირისპირების და შუღლის გამომწვევი განცხადებები არ იყოს ჩვენი ცხოვრების თანმდევი და სტანდარტი, რაზეც კანონი ისედაც არსებობს. პირიქით, მედიას წამყვანი როლი უნდა ჰქონდეს იმაში, რომ სწორედ პოლარიზაციას დაუპირისპირდეს.

ეს ჩვენი ნოუ ჰაუ კი არ არის, ეს სენი მთელ მსოფლიოში გავრცელდა. ციფრულ თუ ჩვეულებრივ სივრცეში რაც ნაკლები იქნება ღვარძლი, დაპირისპირება, გინება, არ აქვს მნიშვნელობა, ეს ირაკლი ქადაგიშვილისგან მოდის თუ სხვისგან, ამით საზოგადოება მოიგებს. ის ადამიანიც მოიგებს, ვინც, შეიძლება, პოტენციურად ამას აკეთებდეს ან ვისაც, შეიძლება, ეს ეხებოდეს. დაჭერაზე არ არის საქმე, ხომ არ თქმულა, რომ რამე ახალი საკანონმდებლო ცვლილებები შემოდის? აქამდეც შეეძლო, ადამიანს ეჩივლა ღირსების შელახვასთან დაკავშირებით", — განაცხადა ირაკლი ქადაგიშვილმა.

ცნობისთვის, დღეს გავრცელდა ინფორმაცია, რომ საქართველოს შინაგან საქმეთა სამინისტროში შეიქმნება სპეციალური სამმართველო, რომლის ფუნქციაც საჯარო სივრცეში სიძულვილის ენის, შეურაცხმყოფელი კამპანიებისა და აგრესიული კომუნიკაციის სისტემური მონიტორინგი და შესაბამისი რეაგირება იქნება.