შინაგან საქმეთა მინისტრის მოადგილის, ალექსანდრე დარახველიძის განცხადებით, საჯარო სივრცეში სიძულვილის ენას მონიტორინგის სამმართველოს მიზანია საზოგადოებაში ისეთი გარემო შეიქმნას, სადაც "მშვიდ ვითარებაში, ჯანსაღი კრიტიკის ფარგლებში ხდება სხვადასხვა საკითხის განხილვა და არა ადამიანების პიროვნული თავდასხმა ერთმანეთზე".

"ერთმანეთისგან გაიმიჯნება ისეთი ქმედებები, რაც დაკავშირებულია აზრის გამოხატვასა და კრიტიკასთან, რომელიც ჯდება ჯანსაღი კრიტიკის ფარგლებში და არ გადადის წაქეზებაში, სიძულვილის ენის გამოხატვასა და ადამიანის ღირსების შელახვაში, რაც არც ერთი ქვეყნის კანონმდებლობით არ არის დაშვებული, მათ შორის არც ჩვენი კონსტიტუციით არის დაშვებული.

სამმართველოს მიზანს წარმოადგენს ის, რომ საზოგადოებაში იყოს ისეთი გარემო, როდესაც მშვიდ ვითარებაში, ჯანსაღი კრიტიკის ფარგლებში ხდება სხვადასხვა საკითხის განხილვა და არა ადამიანების პიროვნული თავდასხმა ერთმანეთზე. ჩვენ უკვე აქტიურად ვმუშაობთ და უახლოეს დღეებში წარმოვადგენთ კონკრეტულ გადაწყვეტილებებს, რაც დაკავშირებული იქნება, როგორც საშტატო რიცხოვნობასთან, ასევე, კონკრეტულ ფუნქციებთან," — განაცხადა დარახველიძემ. (წყარო "იმედი")

შეგახსენებთ, შინაგან საქმეთა სამინისტროში შეიქმნება სამმართველო, რომელიც საჯარო სივრცეში სიძულვილის ენას, შეურაცხმყოფელ კამპანიებსა და აგრესიულ კომუნიკაციას მონიტორინგს გაუწევს და შესაბამის სამართლებრივ რეაგირებას იქონიებს. ამის შესახებ დღეს გამართულ ბრიფინგზე სახელმწიფო მინისტრმა სამართალდამცავი ორგანოების კოორდინაციის საკითხებში მამუკა მდინარაძემ განაცხადა.