გუმათჰესთან, მდინარე რიონში 17 წლის ბიჭი ჩავარდა. როგორც On.ge-ს რიონის ხეობის მცველების წარმომადგენელმა, მირზა ნოზაძემ უთხრა, მისი ჯანმრთელობის მდგომარეობა სტაბილურია, ნატკენი აქვს ფეხი და საავადმყოფოში გადაიყვანეს.

ნოზაძის თქმით, დღეს დილით გუმათში ქუთაისის ერთ-ერთი სკოლის 4 მოსწავლე ნამახვანჰესის საწინააღმდეგო აქციაზე ერთ-ერთის მშობელთან ერთად მივიდა და მათ იქ შეკრებილებმა უსაფრთხოების ნორმებიც აუხსნეს. ნოზაძის თქმით, გარკვეულ პერიოდის შემდეგ ყვირილის ხმა გაიგეს, ბიჭი კი ნაპირზე ჰესის თანამშრომელმა გამოიყვანა.

"თვითმხილველების მოყოლით, ორი ბიჭი გადავიდა კაშხლის ხიდზე, რომელიც პოლიციას ზოგადად ჩაკეტილი აქვს, რომ არავინ გადავიდეს. გადასულან, შეშის მოტანას და ცეცხლის დანთებას აპირებდნენ თურმე. იმ ხიდზე არის რკინის ჯებირები, რომლის ერთი სექცია რატომღაც იყო ამოღებული და ერთ-ერთი გადავარდა ჩანჩქერში, კაშხლის დაბლა მოექცა. საბედნიეროდ, თავისით ამოყვინთა და ჰესის ერთ-ერთმა თანამშრომლებმა მოახერხა მისი ნაპირზე გამოყვანა", — ამბობს ნოზაძე On.ge-სთან.

მისი თქმით, პრობლემაა, რომ პოლიციამ ორი ბიჭი გაუშვა და ადგილზე ჯებირი არ იყო.

"ჩაკეტილი უნდა ყოფილიყო და ახლა დამატებით ჩვენც ჩავაყენეთ ხალხი, იმიტომ რომ ისინი არ ვიცი რას აკეთებდნენ, როგორ და რატომ გაუშვეს ეს ორი ახალგაზრდა", — ამბობს ნოზაძე.