მომდევნო დღისთვის წასაკითხი ასობით გვერდი, მნიშვნელოვანი პრეზენტაცია თუ რთული გამოცდა - ხშირად ეკრანსა თუ სქელტანიან წიგნებში ჩაძირულებს მთელი დღის სამეცადინო მაგიდასთან გატარება გვიწევს. ასეთ დროს მეცადინეობა სტრესსა და გადაღლილობას იწვევს, შედეგად კი ვერაფრით ვპოულობთ მომდევნო გვერდზე გადასვლისა თუ კიდევ ერთი სიტყვის დაწერის მოტივაციასა და ენერგიას. როდესაც სასწავლო მასალა დიდია, დრო კი - მცირე, გადაბმულად, შესვენების გარეშე მეცადინეობა სწორი გამოსავალი სულაც არაა. გადაღლილი გონებით მეცადინეობისას მაგიდასთან გატარებული საათები შეიძლება, არაპროდუქტიული აღმოჩნდეს.

თუ გინდა, რომ შენმა შრომამ შედეგი გამოიღოს, სწავლის პროცესში შესვენების კულტურის გამომუშავება მეცადინეობაზე არანაკლებ მნიშვნელოვანია. ბალანსის დასაცავად შეგიძლია, საკუთარ თავს სწავლისა და შესვენებისთვის დროის კონკრეტული მონაკვეთები განუსაზღვრო, მაგალითად, შეგიძლია 1 საათიდან 45 წუთი სწავლას დაუთმო, 15 წუთი კი - შესვენებას. სწავლის პროცესში დამსახურებული შესვენების ეფექტურად გამოსაყენებლად კი ეს 5 რჩევა გამოგადგება:

1. იმოძრავე!

დიდი ხნის განმავლობაში მეცადინეობის დროს ჩვენი სხეული ნაკლებად მოძრაობს, თანაც მაგიდასთან ჯდომისას წელი და მხრებიც შეიძლება აგვტკივდეს. გადაღლილი გონების ხელახლა ასამუშავებლად მოძრაობა ერთ-ერთი საუკეთესო ხერხია. შეგიძლია, მარტივი გაწელვები გააკეთო, სახტუნაო მოძებნო ან შესვენება მუსიკით გაამრავალფეროვნო და მივიწყებული ილეთები გაიხსენო — არჩევანი შენზეა.

2. დაკავდი მედიტაციით

როდესაც გონებაში ფაქტები, სიტყვები და რიცხვები ერთმანეთში ირევა, მათგან გონების დროებით გათავისუფლება აუცილებელია. ამისათვის ერთ-ერთი საუკეთესო ხერხი მედიტაციაა, რომელიც სტრესის დაძლევაშიც დაგეხმარება. მედიტაციის შემდეგ სამეცადინო მაგიდაზე დახვავებულ სასწავლო მასალას ახალი ენერგიითა და შემართებით შეუტევ.

3. დაალაგე ოთახი

სწავლის დროს ჩვენი ოთახი ხშირად ბუნაგს ჰგავს: ერთმანეთზე დახვავებული წიგნები, მიმოფანტული კალმები და რვეულები, ცარიელი ყავის ჭიქები. ხშირად სასწავლო მასალაში ჩაძირულებს ოთახის დალაგება საერთოდ აღარ გვახსენდება. ჩართე საყვარელი სიმღერა და შეებრძოლე არეულობას! თუ შესვენებას ოთახის დაწკრიალებას მიუძღვნი, დროსაც პროდუქტიულად გამოიყენებ და ვინ იცის, იქნებ, ოთახთან ერთად, შენს გონებაში არეულმა ფაქტებმა, რიცხვებმა და სიტყვებმაც იპოვონ საკუთარი ადგილი.

4. გაისეირნე

მეცადინეობა ხშირად ერთ ოთახში გამოკეტვასთან ასოცირდება. როდესაც მასალას გულს ვერ უდებ, ხშირად გარემოს გამოცვლა ეფექტური ხერხია. დააღწიე თავი ეკრანსა და წიგნებს, შეირბინე უბნის მაღაზიაში, დაათვალიერე უცხო ადამიანები ან ესტუმრე შენს სახლთან ახლოს მდებარე პატარა პარკს. გარემოს გამოცვლა დაგეხმარება, სამეცადინო მაგიდასთან დატოვებულ პრობლემებს ახალი გადაჭრის გზებით, ძალებითა შემართებით დაუბრუნდე.

5. წაიხემსე

სეირნობისას, შეგიძლია, მაღაზიაში შეირბინო და საჭირო პროდუქტებიც მოიმარაგო, რადგან განტვირთვისთვის საკვების მომზადებაც და მირთმევაც ეფექტური გზაა. მეცადინეობას დიდი ენერგია მიაქვს, რომლის შევსებაც აუცილებელია. მოამზადე მარტივი სადილი ან უბრალოდ წაიხემსე. ეცადე, ჯანსაღი და სასარგებლო ნივთიერებებით მდიდარი ინგრედიენტები შეარჩიო. საყვარელი საკვები ენერგიითაც აგავსებს და განწყობასაც გამოგიკეთებს.

მართვისა და კომუნიკაციების სასწავლო უნივერსიტეტი ალტერბრიჯი აბიტურიენტებსა და მაგისტრანტებს სთავაზობს საბაკალავრო და სამაგისტრო პროგრამებს კომუნიკაციების მართვის მიმართულებით. ადგილობრივი და საერთაშორისო პროფესიონალი სპიკერები და პროფესორები; სტუდენტზე მორგებული სწავლების განსხვავებული მეთოდი; ეკოლოგიურად სუფთა გარემოში ორიგინალური დიზაინის მქონე შენობა და, რაც მთავარია, დასაქმების რეალური შანსი ქვეყნის წამყვან კომპანიებში — ამ და სხვა შესაძლებლობებს ალტერბრიჯი გთავაზობთ.