პარტია ერთიანი ნაციონალური მოძრაობის ერთ-ერთი ლიდერის, ლევან ხაბეიშვილის ადვოკატის განცხადებით, სუს-მა მისი დაცვის ქვეშ მყოფს ყველა შეზღუდვა 2 თვით გაუგრძელა. ადვოკატი ლაშა ტყეშელაშვილის განცხადებით, ლევან ხაბეიშვილს არასრულწლოვანი შვილების ნახვას და მათთან დარეკვის უფლებას უკრძალავს.

"სუს-მა ლევან ხაბეიშვილს 2 თვით გაუგრძელა ყველა შეზღუდვა, რაც მას დაუწესეს. სასამართლო 9 დეკემბერს უნდა ჩატარდეს, სადაც ლევან ხაბეიშვილის აღმკვეთი ღონისძიების შეცვლის საკითხი უნდა განგვეხილა — სუს-ს შეეძლო, აღნიშნული შეზღუდვები მხოლოდ 9 დეკემბრამდე გაეგრძელებინა, მაგრამ სუს-მა უკვე მიიღო გადაწყვეტილება სასამართლოს ნაცვლად, რომ ლევან ხაბეიშვილს აღმკვეთი ღონისძიება, პატიმრობა არ შეეცვალოს.

დამოუკიდებელი საქართველოს ისტორიაში ის არის პირველი პოლიტიკოსი, რომელიც პოლიტიკური დაპირების გამო დააკავეს. დააკავეს სიტყვის გამო. ამ შეზღუდვებითაც ჩანს, რომ მათ მისი მართალი სიტყვის ეშინიათ. სუს-ი იყენებს წამების დახვეწილ მეთოდს - მამას არასრულწლოვანი შვილების ნახვისა და მათთან დარეკვის უფლებას ართმევს," — განაცხადა ადვოკატმა.

შეგახსენებთ, 11 სექტემბერს ლევან ხაბეიშვილი დააკავეს. მას "ქრთამის მიცემა — ჩადენილი უკანონო ქმედების ჩასადენად" ედება ბრალად, რაც 4-დან 7 წლამდე პატიმრობას ითვალისწინებს. მოგვიანებით ლევან ხაბეიშვილს, 4 ოქტომბრის საქმესთან დაკავშირებით, ახალი ბრალი წაუყენეს —კონსტიტუციური წყობილების დამხობის მცდელობა.

ლევან ხაბეიშვილი: "რა მედება ბრალად? პოლიტიკოსს ბრალად ედება პოლიტიკური განცხადებები" — სასამართლო პროცესი ვრცლად