სამგანზომილებიანი (3D) პრინტირების ტექნოლოგია ფიზიკური ობიექტების ფენა-ფენა დაბეჭდვას გულისხმობს. კოსმოსში ამ მეთოდით სხვადასხვა ნივთი შეუქმნიათ, თუმცა ადამიანის ფუნქციური ქსოვილების მიღებას ინოვაციური მიდგომა სჭირდება. ამის მიღწევა ისეთ მომავალთან დაგვაახლოებს, სადაც ტრანსპლანტაციისთვის ორგანოების დაბეჭდვა შეგვეძლება. კოსმოსის პირობებში ამის გაკეთება ფართო სამედიცინო კვლევებისა და ტესტირებების საშუალებას მოგვცემს.

ალბათ, გაინტერესებთ, რატომ მაინცდამაინც კოსმოსში? საქმე ისაა, რომ დედამიწის გრავიტაცია ბიოლოგიური ქსოვილების ბეჭდვისას გამოყენებულ მასალებზე (ე.წ ბიოსაღებავზე) ზემოქმედებს. ეს ხელს გვიშლის, რომ ისეთი კუნთოვანი ბოჭკოები შევქმნათ, რომლებიც ჩვენს ორგანიზმში არსებულს ზუსტად ემგვანება.

ამ დაბრკოლების გადასალახად მეცნიერებმა ექსპერიმენტები სპეციალურ საფრენ აპარატში ჩაატარეს, რომლითაც თითქმის ნულოვანი უწონადობის სიმულირებაა შესაძლებელი. ასეთი მიკროგრავიტაციის პირობებში მკვლევრებმა კუნთოვანი ქსოვილი დაბეჭდეს სისტემით, რომელსაც G-FLight ეწოდება.

ეს მცდელობები ისეთი ორგანოების 3D ბეჭდვის მიღწევას ემსახურება, რომლებიც ტრანსპლანტაციისთვის დონორების მოლოდინში მყოფი პაციენტებისთვის იქნება განკუთვნილი. ამას შეუძლია, რომ არაერთი სიცოცხლე იხსნას, რადგან ადამიანები ზოგჯერ სათანადო სისხლის ჯგუფის დონორის ორგანოს წლობით ელიან.

მიკროგრავიტაციასა და ჩვეულებრივ გარემოში სხვაგვარი ბიომატერიის ბეჭდვაზეც მუშაობენ, როგორიცაა თვალის ბადურა, ღვიძლის ქსოვილი, შარდის ბუშტი და ა.შ. რაც შეეხება ახალ კვლევას, შესაძლოა, ეს ასტრონავტების კუნთოვანი მასის კარგვის პრობლემის მოგვარებაშიც დაგვეხმაროს. მათი სხეული კოსმოსში ყოფნისას გრავიტაციის ნაკლებობის გამო მნიშვნელოვან ცვლილებებს განიცდის, ხანგრძლივი მისიებისას კი ეკიპაჟის ჯანმრთელობის შენარჩუნება პრიორიტეტულია.

ახალი ნაშრომი გამოცემაში Advanced Science გამოქვეყნდა.