თუ ეძებთ გზებს, როგორ გაუღვივოთ მოსწავლეებს ინტერესი სამოქალაქო განათლებაში მაშინ შემოდგომისთვის დაელოდეთ ინოვაციურ, საგანმანათლებლო და სახალისო ანიმაციების სერიას, რომელიც იქმნება აშშ-ის საერთაშორისო განვითარების სააგენტოს (USAID) ხელშეწყობით.

სკოლის მოსწავლეებისთვის დემოკრატიის პრინციპების შესახებ 8 ანიმაციური სერია მზადდება, რომლის ჩვენებაც შესაძლებელი იქნება საგაკვეთილო პროცესში და ხელს შეუწყობს სწავლა-სწავლების პროცესი გახდეს მეტად სახალისო, მარტივად აღქმადი და საინტერესო. ამასთანავე, ანიმაციური რგოლების შექმნა ემსახურება სამოქალაქო განათლების მნიშვნელობის წინ წამოწევას, ცნობიერების ამაღლებასა და მოსწავლეების წახალისებას ჩაერთონ სამოქალაქო ცხოვრებაში.

ანიმაციური რგოლების სხვადასხვა სერიაში ენთუზიასტ, ცნობისმოყვარე და გამბედავ პერსონაჟებსა და მათ მეგობარ ყოვლისმცოდნე, "ცოცხალი წიგნის" ფუნქციის ღრუბელ "ბურუსს" უწევთ გამოცადონ ახალი თავგადასავლები, წააწყდნენ სირთულეებს და იპოვონ მათი გადაჭრის გზები. სახალისოდ გადმოცემული ანიმაციების გზით, ახალგაზრდები სწავლობენ თუ როგორ უნდა ფუნქციონირებდეს დემოკრატიული სახელმწიფო, რომელსაც ჰყავს ძლიერი სამოქალაქო საზოგადოება.

ანიმაციური სერიები მოიცავს ისეთ თემებს, როგორებიცაა: მედიაწიგნიერება, არჩევნები, ადამიანის უფლებები, ტოლერანტობა, გამჭვირვალობა, ჩაგვრა, მოქალაქეთა ჩართულობა და ხელისუფლების კონტროლი. ანიმაცია მიზნად ისახავს ახალგაზრდებს დაეხმაროს გააცნობიერონ, თუ რამდენად მნიშვნელოვანია მათი როლი დემოკრატიულ პროცესში. ანიმაციაში შეხვდებით ისეთ ფრაზებს, როგორიცაა:

"აუცილებელია, რომ ძალაუფლების მქონე სტრუქტურებმა ერთმანეთი დააბალანსონ, რათა ძალაუფლების წყარო არ მოირგონ საკუთარ თავზე"; "უფლებების დარღვევის შემთხვევაში ნებისმიერ ადამიანს შეუძლია აიმაღლოს ხმა მათ დასაცავად, მაგალითად, მიმართოს შესაბამის სტრუქტურებს, ადგილობრივსა თუ საერთაშორისოს" და სხვა.

აშშ-ის საერთაშორისო განვითარების სააგენტომ (USAID) სამოქალაქო განათლების პოპულარიზების მიზნით წამოიწყო კამპანია — "სამოქალაქო განათლება მნიშვნელოვანია" მთავარი გზავნილით #ისწავლერომშეცვალო. კამპანიის ერთ-ერთი აქტივობა სამოქალაქო განათლების სხვადასხვა აქტუალური თემატიკის შესახებ ვიდეორგოლების შექმნაა და ეხმიანება თითოეული ადამიანის, განსაკუთრებით ახალგაზრდების ჩართულობის, ტოლერანტობის და სხვა დემოკრატიული პრინციპების მნიშვნელობას.

ანიმაციური სერიების სანახავად და მეტი ინფორმაციისთვის თვალყური ადევნეთ USAID-ის სოციალური ქსელის გვერდს.