EMC განათლების სამინისტროსა და საქართველოს მთავრობას მოუწოდებს უმაღლეს განათლებაზე თანაბარი ხელმისაწვდომობის უზრუნველსაყოფად ყველა ზომა მიიღოს. ორგანიზაციაში აცხადებენ, რომ პანდემიით შექმნილი კრიზისის გამო სტუდენტების ნაწილი სწავლის გადასახადის დაფარვას ვერ ახერხებს.

"ბოლო პერიოდში მედიაში ვრცელდება ინფორმაცია სტუდენტების მიერ ორგანიზებული პროცესის შესახებ რომლებიც სწავლის გადასახადის გადავადებას ან შემცირებას ითხოვენ. შეიქმნა სტუდენტების პეტიცია, საფასურის განახევრებისა და სტატუსშეჩერებული სტუდენტებისთვის სტატუსის აღდგენის შესახებ. კიდევ ერთ პეტიციაში აღნიშნულია, რომ სტატუსშეჩერებული სტუდენტების რაოდენობა მნიშვნელოვნად გაიზარდა პანდემიის პირობებში, რამდენადაც ფინანსური კრიზისის გამო ახალგაზრდები და მათი ოჯახები ვეღარ ფარავენ სწავლის გადასახადს და სტუდენტები იძულებული არიან უარი თქვან განათლებაზე", — ვკითხულობთ ორგანიზაციის მიერ გავრცელებულ განცხადებაში.

ორგანიზაციაში აღნიშნავენ, რომ პანდემიის გავლენა მოქალაქეების სოციალურ-ეკონომიკურ და უთანასწორობის მაჩვენებელზე გრძელვადიანი იქნება და დიდი ალბათობით ის უმაღლესი განათლების ხელმისაწვდომობასა და კურსდამთავრებულთა დასაქმების პერსპექტივაზე აისახება.

"ამ დროისთვის არსებული კვლევები აჩვენებს რომ კორონავირუსის პანდემიას ექნება გრძელვადიანი გავლენა შრომის ბაზარზე, მოქალაქეების ეკონომიკურ და სოციალურ დაცულობაზე და უთანასწორობის მაჩვენებლებზე, რაც მაღალი ალბათობით უმაღლესი განათლების მისაწვდომობასა და კურსდამთავრებული სტუდენტების დასაქმების პერსპექტივებზე აისახება", — წერია განცხადებაში.

ორგანიზაციაში ამბობენ, რომ ამ ფონზე პრობლემურია ის , რომ სახელმწიფო გავლენას განათლების სისტემასა და სტუდენტების სხვადასხვა ჯგუფებზე სიღრმისეულად არ იკვლევს. ამერიკის შეერთებულ შტატებში ჩატარებული ერთ-ერთი კვლევის თანახმად, გამოკითხული სტუდენტების 13% სწავლას კორონავირუსის პანდემიის გამო დაგეგმილზე უფრო გვიან დაამთავრებს. ამასთან, EMC-ში აღნიშნავენ, რომ მართალია, უარყოფით ზეგავლენას სტუდენტების ყველა ჯგუფი დაექვემდებარა, თუმცა დაბალშემოსავლიანი სტუდენტებისთვის სწავლის გადადების მაჩვენებელი 55%-ით მეტია, ვიდრე დანარჩენი სტუდენტების შემთხვევაში.

EMC-ის განცხადებაში ყურადღება გამახვილებულია პანდემიისა და ონლაინ სწავლებასთან დაკავშირებულ სტრესსზეც, რაც, ორგანიზაციის თანახმად, დაბალშემოსავლიან სტუდენტებს ისედაც უკიდურესად მძიმე მდგომარეობაში აყენებს.

ზემოაღნიშნულიდან გამომდინარე EMC საქართველოს მთავრობასა და განათლების სამინისტროს მოუწოდებს:

• შეისწავლოს სტუდენტების მიერ სტატუსის შეჩერების მიზეზები და უმაღლესი განათლების თანაბარი მისაწვდომობის უზრუნველსაყოფად, მიიღოს დაუყოვნებლივი ზომები იმ სტუდენტების სათანადო მხარდაჭერისათვის, რომლებიც ეკონომიკური მდგომარეობის გამო ვერ ახერხებენ სწავლის გადასახადის დაფარვას
• სიღრმისეულად შეისწავლოს სტუდენტების საჭიროებები, შექმნილი კრიზისის ზეგავლენის ხასიათი და მასშტაბი სტუდენტების სხვადასხვა ჯგუფებზე და შეიმუშავოს გრძელვადიანი პოლიტიკა უმაღლესი განათლების სისტემაში პანდემიით გამოწვეული უარყოფითი შედეგების შესამცირებლად და თანასწორი შესაძლებლობების უზრუნველსაყოფად.