რადიო თავისუფლების ინფორმაციით, 4 დეკემბერს ეჩმიაძინის ეკლესიის არქიეპისკოპოსი, არშაკ ხაჩატრიანი ნარკოდანაშაულის ბრალდებით დააკავეს. სომხეთის პრემიერმინისტრის, ნიკოლ ფაშინიანის მოწინააღმდეგე სასულიერო პირი, სავარაუდოდ, ეკლესიასთან დაკავშირებულ სექს-სკანდალშიც ფიგურირებს.

სომხეთის საგამოძიებო კომიტეტის თანახმად, ეჯმიაწინის კანცელარიის ხელმძღვანელი არქეპისკოპოსი ნარკოტიკების უკანონო გასაღების ბრალდებითაა დაკავებული. გამოძიების მიხედვით, 2018 წელს ხაჩატრიანის დავალებით სომეხთა პატრიარქის, გარეგინ II ის მოწინააღმდეგე აქტივისტს ნარკოტიკული საშუალება "ჩაუდეს". ხაჩატრიანის ადვოკატის, არსებ ბაბაიანის განცხადებით, მისი დაცვის ქვეშ მყოფის ბრალდებაზე "აბსურდული არაფერი გაუგია". ადვოკატის შეფასებით ხაჩატრიანის წინააღმდეგ წაყენებული ბრალდება "კლასიკური პოლიტიკური დევნის" შემთხვევაა.

"რაც მოხდა, ზუსტად ის არის, რაც ჩვეულებრივ ხდება ასეთ პოლიტიკურ საქმეებში. არ არსებობს საფუძველი, ვთქვათ, რომ მთავარეპისკოპოს არშაკს დანაშაული ჩაუდენია. მხოლოდ გარკვეულ მონაცემებზე დაფუძნებული ეჭვები არსებობს," — განაცხადა ადვოკატმა.

ხვალ, არქიეპისკოპოსის აღკვეთი ღონისძიებაზე მოსამართლე მაზის მელკონიანი იმსჯელებს. რადიო თავისუფლების ინფორმაციით, ამ მოსამართლემ უკვე ორი არქიეპისკოპოსს, ბაგრატ გალსტანიანის და მიქაელ აჯაპაჰიანს პატიმრობა შეუფარდა.

ცნობისთვის, 29 ოქტომბერს საქმე აღიძრა სომხეთის სისხლის სამართლის კოდექსის 204-ე მუხლის მე-3 ნაწილის მე-2 პუნქტით — "პირადი ცხოვრების ხელყოფა სპეციალური ტექნიკური საშუალებების გამოყენებით ინფორმაციის მოსაპოვებლად". გამოძიება მას შემდეგ დაიწყო, რაც 25 ოქტომბერს ერევანში დაფუძნებულმა არასამთავრობო ორგანიზაციამ — "ინფორმირებული მოქალაქეების კავშირი" — პროკურატურას მიმართა განცხადებით, რომ Telegram-არხზე გამოქვეყნდა ინტიმური ხასიათის ვიდეო, რომელშიც, გავრცელებული ცნობებით, შესაძლოა ხაჩატრიანი იყოს ასახული. ოთხი დღის შემდეგ, გენერალურმა პროკურატურამ საჩივარი საგამოძიებო კომიტეტს გადასცა, რათა გადაეწყვიტათ, დაიწყოთ თუ არა სრულფასოვანი გამოძიება.

მიმდინარე წელს ფაშინიანს ღიად დაპირისპირება ჰქონდა სასულიერო პირებთან. პრემიერმინისტრმა ხაჩატრიანს საჯარო გამოსვლაში "ამორალური და უსირცხვილო" უწოდა და მას "ზნეობრივი დეგენერაციაში" დასდო ბრალი. დაპირისპირება, რომელიც თავდაპირველად ეკლესიის ავტორიტეტისა და სახელმწიფოსა და კათოლიკოს გარეგინ II-ის ურთიერთობების თაობაზე დაიწყო, თანდათან პოლიტიკურ და მორალურ ბრძოლად გადაიქცა.