ევროპული საქართველოს ქუთაისის მაჟორიტარი დეპუტატობის კანდიდატის, ოთარ კახიძის თქმით, მიხეილ სააკაშვილსა და ნაციონალურ მოძრაობას, ბიძინა ივანიშვილის კოალიციური ერთობით დამარცხება არ სურს. როგორც კახიძემ აღნიშნა, სააკაშვილს სურს ერთპიროვნული და ერთპარტიული მმართველობა.

კახიძემ აღნიშნა, რომ სააკაშვილი და ივანიშვილი ერთმანეთს კვებავენ და მიხეილ სააკაშვილი ელოდება ისეთ მომენტს, როცა ხალხი დაიღლება და მის გარდა ალტერნატივას ვერ დაინახავს.

"მიხეილ სააკაშვილი არ მგონია ისეთი ტიპის პოლიტიკური ფიგურა, რომელიც ვინმეს ჭკუაზე დადის და ვინმეს წაქეზებით. ის საკმაოდ გამოცდილი პოლიტიკოსია და ამას შეგნებულად აკეთებს. მინდა ხაზი გავუსვა, მიხეილ სააკაშვილს ბიძინა ივანიშვილის დამარცხება, კოალიციური ოპოზიციური ერთობით, რომელიც მთავრობაში მოვა, არ სურს. მიხეილ სააკაშვილს ბიძინა ივანიშვილის დამარცხება არ სურს, მას სურს თვითონ გახდეს მმართველი. ეს ორი სხვადასხვა რამაა. ასეთ წარმოდგენას, რომ ბიძინა და მიშა არიან მხოლოდ პოლიტიკურ სპექტრში, რასაც ბიძინა ამბობს, ამას როდესაც იმეორებს მიშა, ეს ნიშნავს, რომ ისინი ერთმანეთს კვებავენ. ბიძინას ხელისუფლების შენარჩუნება უნდა, მიშა კი ისეთ მომენტს ელოდება, როცა ხალხი იმდენად დაიღლება, რომ მის გარდა ალტერნატივას ვერ დაინახავს. ეს ფუჭი მოლოდინია" — განაცხადა ოთარ კახიძემ.