ამერიკის შეერთებული შტატების პრეზიდენტმა დონალდ ტრამპმა Fox news-თან ინტერვიუში განაცხადა, რომ თუ ირანის მთავრობა მოქალაქეებს დახოცავს, აშშ ირანელ ხალხს დაეხმარება.

"არავის არასდროს უნახავს ისეთი რამ [ირანში პროტესტი], რაც ახლა ხდება. მე წინასწარ ვთქვი, რომ თუ ისინი ხალხს ესვრიან, ჩვენ მათ ძალიან ძლიერად დავარტყამთ... ეს ხალხი [მოქალაქეები] სრულიად შეუიარაღებელი ხალხია, მათ უყვართ თავიანთი ქვეყანა", — თქვა ტრმპმა.

ცნობისთვივს, ირანში მასობრივი ქუჩის საპროტესტო აქციები 28 დეკემბრიდან მიმდინარეობს. ისინი თეირანის მთავარ ბაზარში დაიწყო, სადაც ჰიპერინფლაციისა და ფასების მკვეთრი რყევებზე პროტესტის ნიშნად ბევრმა მაღაზიის მეპატრონემ თავისი სავაჭრო ობიექტი დახურა.

29 დეკემბერს ირანის ეროვნული ვალუტა, რიალი, ახალ რეკორდულ მინიმუმამდე დაეცა (ერთი რიალი დაახლოებით 0.00002 ევროს ტოლი იყო). მსოფლიო ბანკის მონაცემებით, ოქტომბერში ირანში სურსათის ინფლაციამ 64.2%-ს მიაღწია — ეს მაჩვენებელი ქვეყნის ანტიინფლაციური რეიტინგით მხოლოდ სამხრეთ სუდანს უსწრებს.