საზღვაო ტრანსპორტის სააგენტო განცხადებას ავრცელებს, სადაც წერს, რომ ამჟამად აზუსტებენ იმყოფებოდნენ თუ არა აშშ-ს მიერ დაკავებულ რუსულ ტანკერზე ქართველები. ტანკერზე 6 ქართველის, მათ შორის კაპიტნის არსებობის შესახებ ინფორმაცია რუსულმა მედიამ დღეს გაავრცელა.

"ღია წყაროების მიხედვით, 2026 წლის 7 იანვარს აშშ-ის მიერ ატლანტის ოკეანეში დაკავებული ტანკერის Marinera ეკიპაჟის შემადგენლობაში იმყოფება 28 მეზღვაური, მათ შორის 6 – საქართველოს მოქალაქე, რომელთაგან ერთ-ერთი, გავრცელებული ინფორმაციით, გემის კაპიტანია. ასევე, ეკიპაჟში არიან უკრაინის 20 და რუსეთის ფედერაციის 2 მოქალაქე.

არსებული ინფორმაციით, აღნიშნული ტანკერი დაკავებული იქნა აშშ-ის მიერ ვენესუელაზე დაწესებული საერთაშორისო სანქციების შესაძლო დარღვევის ბრალდებით.

სსიპ საზღვაო ტრანსპორტის სააგენტო ამჟამად ახორციელებს ფაქტობრივი გარემოებების დაზუსტებას, მათ შორის, გემის დამსაქმებელი კომპანიის იდენტიფიცირებას და ეკიპაჟის ქართველი წევრების შესახებ ინფორმაციის მოძიებას", — წერია საზღვაო ტრანსპორტის სააგენტოს მიერ გავრცელებულ ინფორმაციაში.

აშშ-მა 2 რუსული ტანკერი გუშნ, 7 იანვარს დააკავა. გავრცელებული ტანკერები სანქცირებული და ვენესუელასთან იყო დაკავშირებული.