უშიშროების ყოფილი მინისტრი იგორ გიორგაძე, რომელსაც ექსპრეზიდენტ ედუარდ შევარდნაძეზე განხორციელებული ტერორისტული თავდასხმის ორგანიზება ედება ბრალად, სოციალურ ქსელში ვიდეოებს აქვეყნებს, სადაც "საქართველოში დაბრუნებაზე", რუსეთის მიერ ოკუპირებული აფხაზეთისა და სამხრეთ ოსეთის ბედსა და "საქართველოს ისტორიულ გამოწვევებზე" საუბრობს. მისი თქმით, "ერთხელ და სამუდამოდ უნდა ამოვიგდოთ თავიდან ილუზია, რომ საკმარისია კრემლმა აფხაზებსა და ოსებს უბრძანონ და ისინიც წამზე, მორჩილი ცხვრებივით დაუბრუნდებიან საქართველოს".

"ეს არ მოხდება. ან კი რის გამო უნდა აიძულოს რუსეთმა აფხაზეთი და სამხრეთ ოსეთი დაუბრუნდნენ საქართველოს, როცა საქართველოს მოქმედი კონსტიტუციის 78-ე მუხლი ყველა სახელმწიფო ორგანის მიუთითებს, რომ ევროკავშირსა და ნატოში გასაწევრიანებლად ყველა ღონე იხმაროს? ამიტომ, აუცილებელია ვიმსჯელოთ არა ტერიტორიული მთლიანობის აღდგენაზე, არამედ ჩვენს აფხაზ და ოს ძმებთან წარსული ერთობის აღდგენაზე, რისიც გულწრფელად მწამს", — ამბობს იგორ გიორგაძე ვიდეოში.

მისივე თქმით, მის "მშობლიურ საქართველოში დაბრუნების საკითხი დგას არა სამართლებრივ, არამედ პოლიტიკურ სიბრტყეში".

"რაც ჩემს გარშემო ხდება, არანაირი კავშირი არ აქვს იურისპრუდენციასთან და სამართლიანობასთან. მინდა ხაზი გავუსვა, რომ ჩემს მიერ წამოწყებული სასამართლო პროცესი თითქმის 10 წელი გრძელდება. ამ დროის განმავლობაში სასამართლოსთვის არ წარუდგენიათ არანაირი მტკიცებულება, ჩემი მხრიდან რაიმე კანონსაწინააღმდეგო ქმედების.

საერთაშორისო ექსპერტების აზრით, სასამართლო პროცესს მიზანმიმართულად აფერხებენ და ამას მხოლოდ პოლიტიკური მოტივი აქვს.

ცნობისთვის, იმავე 2016 წელს, როცა პროცესი დაიწყო, ინტერპოლის გენერალურმა სამდივნომ თვე ნახევრის განმავლობაში ჩემი საკითხი განიხილა და ჩემზე საერთაშორისო ძებნა მოხსნა, ჩათვალეს, რომ ამის არანაირი საფუძველი არ არსებობდა. და 10 წელია ადგილობრივ ძებნაში ვარ საქართველოს ამჟამინდელი ხელისუფლების მიერ. ჩემი იურისტები მსაყვედურობენ, რომ საერთაშორისო პრაქტიკაში ასეთი მეორე პრეცედენტი არ არსებობს", — აცხადებს გიორგაძე.

მესამე ეპიზოდში გიორგაძე "საქართველოს ისტორიულ გამოწვევებზე" საუბრობს და ანტიევროპულ პროპაგანდას ეწევა.

"ევროპელმა ლიდერებმა არჩევანის წინაშე დაგვაყენეს. ან ჩვენი ევროპულ ლიბერალური ფასეულობებით იცხოვრებთ, სრული ლგბტ ნაკრებით, დაწყებით სკოლებში ბავშვებს სექსუალურ განათლებას მისცემთ, ერთსქესიანი ქორწინებისადმი ტოლერანტობითა და სქესის შეცვლის სხვა სიამტკბილობებით, რასაც საბავშვო ბაღებიდან ეყრება საფუძველი, მაშინ გექნებათ დოვლათი და შეგეძლებათ დაუბრკოლებლად გადაადგილებას ჩვენს ცივილიზებულ ქვეყნებში. ან გაგრიყავთ, ჟანგბადს გადაგიკეტავთ და სანქცირებით დაგახრჩობთ. არსებითად, ჩვენ დღეს ისტორიული გამოწვევების წინაშე ვდგავართ", — ამბობს გიორგაძე.

იგორ გიორგაძე საქართველოს სახელმწიფო უშიშროების მინისტრი იყო 1993-1995 წლებში, 1995 წლიდან ბრალდებულია ტერორიზმში. 1995–2016 წლებში იძებნებოდა ინტერპოლის მიერ. ის ამჟამად, სავარაუდოდ, რუსეთში იმყოფება.