მინეაპოლისში, საიმიგრაციო და საბაჟო სამსახურის სპეცოპერაციის დროს, ამერიკის საიმიგრაციო აგენტმა 37 წლის ქალს მანქანაში ესროლა, რის შემდეგაც ის გარდაიცვალა. CNN-ის ინფორმაციით, აშშ-ის შიდა უსაფრთხოების დეპარტამენტის პოზიციაა, რომ ქალი ოფიცრისთვის მანქანის დაჯახებას ცდილობდა და გასროლა თავდაცვის მიზნით მოხდა. მედია შემთხვევის ამსახველ ვიდეოს ავრცელებს, სადაც თავდასხმა სამივე რაკურსითაა ნაჩვენები.

მინეაპოლისის მერი ჯეიკობ ფრეი უსაფრთხოების დეპარტამენტის პოზიციას უარყოფს და პრესკონფერენციაზე საიმიგრაციო დეპარტამენტს (ICE) მიმართა, რომ "გაეთრიონ" (get the fuck out) მინეაპოლისიდან.

მომხდარს მოგვიანებით აშშ-ის პრეზიდენტი, დონალდ ტრამპი Truth Social-ზე გამოეხმაურა. ტრამპის ვერსიით, გარდაცვლილი ქალი სამართალდამცავების მუშაობას ხელს უშლიდა და საიმიგრაციო დეპარტამენტის თანამშრომლისთვის მანქანით დარტყმას ცდილობდა.

"ქალი, რომელიც ავტომობილს მართავდა, პროცესს ხელს უშლიდა და ეწინააღმდეგებოდა, შემდეგ კი განზრახ და სასტიკად გადაუარა ICE-ის ოფიცერს, რომელმაც, როგორც ჩანს, თავდაცვის მიზნით ესროლა," — წერს ტრამპი.

შემთხვევას ვიცე-პრეზიდენტი ჯეი დი ვენსიც გამოეხმაურა X-ზე. ვენსის აზრით, ქალმა "თავისი ბედი თავისით გადაწყვიტა".

"ჩვენ შეგვიძლია შევთანხმდეთ იმაზეც, რომ ქალის გარდაცვალება ტრაგედიაა და იმ ფაქტზეც, რომ მან თავის თავს მოსწია ეს ყველაფერი — არ შეუშალო სამართალდამცავებს მუშაობაში ხელი და არ გადაუარო მანქანით ოფიცერს ასეთი მარტივია," — წერს ვენსი.

ინციდენტიდან მალევე, მოქალაქეებმა შემთხვევის ადგილზე შეკრება და მომხდარის გაპროტესტება დაიწყეს. ადგილზე მათსა და საპოლიციო ძალებს შორის შეტაკება მოხდა.