რუსული მედია აშშ-ის სამხედროების მიერ რუსული ტანკერ Marinera-ს დაკავების შესახებ ახალ დეტალებზე წერს. მათი ინფორმაციით, Marinera საერთაშორისო წყლებში რუსეთის დროშის ქვეშ დაცურავდა. ის გაიანას დროშის ქვეშ კერძო სავაჭრო კომპანიამ დაიქირავა. ეკიპაჟი 28 წევრისგან შედგებოდა. მათგან 20 უკრაინელი იყო, ექვსი, კაპიტნის ჩათვლით, საქართველოს მოქალაქე, ხოლო ორი — რუსეთის.

ამასთან დაკავშირებით ქართულ მხარეს განცხადება ჯერ არ გაუკეთებია.

მანამდე რუსეთის საგარეო საქმეთა სამინისტრომ გაავრცელა ინფორმაცია, სადაც მოითხოვა, რომ ამერიკულმა მხარემ უზრუნველყოს ტანკერის ეკიპაჟის წევრების მიმართ ჰუმანური და ღირსეული მოპყრობა და არ შეაფერხოს მათი სამშობლოში სწრაფი დაბრუნება.

შეგახსენებთ, რომ 7 იანვარს, აშშ-ის სამხრეთ სარდლობამ კარიბის ზღვის საერთაშორისო წყლებში ვენესუელასთან დაკავშირებული რუსეთის "ჩრდილოვანი ფლოტის" 2 ტანკერი დააკავეს — Marinera — ჩრდილო ატლანტიკაში და M/T Sophia — კარიბის ზღვაში. სამხედროების ცნობით, ორივე გემი აშშ-ის სანქციების დარღვევით უკანონო საქმიანობაში იყო ჩართული.

გავრცელებულ განცხადებაში ხაზგასმულია, რომ ოპერაცია "სამხრეთის შუბის" ფარგლებში ჩატარდა და პენტაგონი "მტკიცედ აგრძელებს დასავლეთ ნახევარსფეროში უკანონო საქმიანობის ჩაშლის მისიას" და დაიცავს სამშობლოს და აღადგენს უსაფრთხოებას და ძლიერებას მთელ ამერიკაში.