8 იანვარს, დიდი ბრიტანეთის თემთა პალატის წევრმა, ლეიბორისტული პარტიის წევრმა, ფილ ბრიკელმა ბიძინა ივანიშვილის დასანქცირებაზე ისაუბრა. მან პარლამენტში სიტყვით გამოსვლისას ყულევის ნავთობგადამამუშავებელ ქარხანაზე ისაუბრა, რომელმაც გასული წლის ოქტომბერში რუსული ნავთობის პირველი პარტია მიიღო. ბრიკელის განცხადებით, ოცნებამ აღნიშნულ ქარხანას სახელმწიფო დაფინანსება გაუზარდა, რაც ივანიშვილისთვის დასანქციების მიზეზი შეიძლება იყოს.

"გაერთიანებულმა სამეფომ ვერ შეძლო ბიძინა ივანიშვილის სანქცირება — ადამიანის, რომელიც ფართოდ განიხილება, როგორც საქართველოს პოლიტიკურ კურსზე გადამწყვეტი გავლენის მქონე პირი.

ივანიშვილს შეიძლება სანქციები დაუწესდეს ნებისმიერი — იქნება ეს მაგნიტსკის, გლობალური ანტიკორუფციული თუ რუსეთის სანქციების რეჟიმიც კი, მისი კრემლთან კავშირების გათვალისწინებით.

რაც შეეხება საქართველოს, ამ დილით შემატყობინეს, რომ ქართულმა ოცნებამ გაზარდა ყულევის ნავთობგადამამუშავებელი ქარხნის სახელმწიფო დაფინანსება, რომელმაც, Reuters-ის ინფორმაციით, გასული წლის ოქტომბერში რუსული ნავთობის პირველი პარტია მიიღო.

თავად ეს ქარხანა დაკავშირებულია ვლადიმერ ალექსეევთან, რუსეთის "გრუ-ს" უფროსის პირველ მოადგილესთან. აქ იკვეთება სანქციების დარღვევის აშკარა გზა და იმედი მაქვს, ეს დაემატება ივანიშვილის ბრალს," — განაცხადა ბრიკელმა.

Reuters-ის ინფორმაციით, 6 ოქტომბერს რუსულმა კომპანია "რუსნეფტმა" ყულევში ახლად აშენებულ ქარხანას ნოვოროსიისკის პორტიდან გამოგზავნილი 105 ათასი ტონა ნავთობი მიაწოდა საზღვაო ტანკერ "კაისერის" (Kayseri) გამოყენებით. ტვირთი ყულევის ნავთობის ტერმინალმა მიიღო, რომელიც ქარხნიდან 5 კილომეტრის დაშორებით მდებარეობს. 22 ოქტომბერს კი აშშ-ის ფინანსთა სამინისტროს უცხოური აქტივების კონტროლის ოფისმა (OFAC) "რუსნეფტი" და "ლუკოილი" დაასანქცირა. დეკემბერში, აშშ-ს შემდეგ რუსული ნავთობკომპანია "რუსნეფტი" დიდმა ბრიტანეთმაც დაასანქცირა.

როგორც TI წერს, 2025 წლის 21 ოქტომბერს, Reuters-მა გამოაქვეყნა სტატია რუსული ნავთობის ყულევში შეტანის შესახებ. ინციდენტმა გააჩინა ეჭვები — ხომ არ არის ყულევის ნავთობგადამამუშავებელი ქარხანა რუსეთზე დაწესებულ სანქციებზე გვერდის ავლის სქემის ნაწილი. ამასთან, მორიგ ჯერზე დაისვა კითხვები, თუ რატომ ხდება საქართველოს მიერ რუსული ნავთობის შეძენა და რუსეთისთვის ფულის გადარიცხვა უკრაინაში მიმდინარე ომის ფონზე.