ოცნების ხელისუფლების ჯანდაცვის მინისტრის, მიხეილ სარჯველაძის ბრძანებით სახელმწიფო დაზღვევა იმ მოქალაქეებს შეუწყდებათ, რომლებიც ქვეყანას 6 თვით ან მეტით დატოვებენ. დადგენილება 31 დეკემბერს გამოიცა და 1 იანვრიდან ამოქმედდა.

სახელმწიფო დაზღვევის დაკარგვის შემთხვევაში მოქალაქე თავიდან უნდა დარეგისტრირდეს პროგრამაში.

"2026 წლის 1 ივნისიდან ყოველთვიურად, განმახორციელებლის მიერ განხორციელდეს საყოველთაო ჯანმრთელობის დაცვის გეგმური ამბულატორიული მომსახურების ფარგლებში ბენეფიციართა რეგისტრაციის მოდულიდან იმ ბენეფიციართა რეგისტრაციის შეჩერება, რომლებიც იმყოფებიან ქვეყნის ფარგლებს გარეთ 6 თვე და მეტი ვადით უწყვეტად.

მოსარგებლის ხელახალი რეგისტრაცია ხორციელდება "საყოველთაო ჯანდაცვაზე გადასვლის მიზნით გასატარებელ ზოგიერთ ღონისძიებათა შესახებ" საქართველოს მთავრობის 2013 წლის 21 თებერვლის №36 დადგენილებით დამტკიცებული პროგრამის 23-ე მუხლის მე-4 პუნქტით განსაზღვრული პირობების შესაბამისად," — ვკითხულობთ ბრძანებაში.