ბათუმელებისა და ნეტგაზეთის დამფუძნებელი მზია ამაღლობელი ზურაბ ჭავჭანიძეს და ზურაბ მენთეშაშვილის ციხიდან მიმართავს. მზია ამაღლობელმა დაკავებიდან მალევე შიმშილობა დაიწყო, რომელმაც 38 დღე გასტანა.

"ვიცი, რომ ახლა ფსიქოლოგიურად რაც გაძლებინებთ, ეგ შიმშილობაა. ეს ბრაზი, რასაც ამ შიმშილობით ებრძვით, არსად არ წავა. მე დღესაც მიჭირს მოვერიო ამ ბრაზს, მაგრამ მთავარია გადარჩე, გადარჩე რადგან გარეთ მყოფებს უფრო უჭირთ ჩვენს გამო.

გარეთ მყოფი მყოფი ადამიანები მათ გვერდით გვაცხოვრებენ, რისთვისაც მადლიერი უნდა ვიყოთ.

იმაზე ფიქრი, რომ ჩვენ ცუდად ვართ, ან სიცოცხლეს საფრთხე ემუქრება, მათ ცხოვრებას კიდევ უფრო ამძიმებს.

ეს ალბათ ის მომენტია, როცა მათზე მეტი უნდა ვიფიქროთ. ისედაც არავინ გვყავს ერთმანეთის გარდა.

ისუნთქეთ და იცოცხლეთ მათთვის, ვინც გარეთ არის," — წერს მზია ამაღლობელი ციხიდან.

ზურაბ ჭავჭანიძე და ზურაბ მენთეშაშვილი 50 დღეზე მეტია შიმშილობენ. 4 ოქტომბრის საქმეზე დაკავებული ზურაბ ჭავჭანიძე უკვე 56 დღეა შიმშილობს, ხოლო გზის უკანონო გადაკეტვის ბრალდებით დაკავებული ზურაბ მენთეშაშვილი — 70 დღე.