თბილისის საქალაქო სასამართლომ, 20 ივნისის საქმეზე ყოფილი პრემიერმინისტრის და პარტია გახარია საქართველოსთვის ლიდერის, გიორგი გახარიას წინააღმდეგ აღმკვეთი ღონისძიების სახით პატიმრობა ძალაში დატოვა.

პროკურატურის მოთხოვნით, თბილისის საქალაქო სასამართლომ დაუშვებელ მტკიცებულებად ცნო გახარიას ადვოკატის მიერ წარდგენილი ბიძინა ივანიშვილის, ირაკლი კობახიძის, მამუკა მდინარაძის, ვახტანგ გომელაურისა და თეა წულუკიანის საჯარო განცხადებები 20 ივნისის მოვლენებთან დაკავშირებით, რომლებიც გაკეთებული იყო გიორგი გახარიას გადადგომამდე და რომლებშიც აღნიშნული პირები აქებდნენ/იცავდნენ გახარიას ქმედებებს 20 ივნისის მოვლენებზე.

ექსპრემიერის პარტიის წევრები დღევანდელ სასამართლოს სოციალურ ქსელში გამოეხმაურნენ.

ტატა ხვედელიანის თქმით, მიუკერძოებელმა გამოძიებამ უნდა უპასუხოს კითხვას, თუ ვინ გასცა ბრძანება აქციაზე რეზინის ტყვიების გამოყენების შესახებ.

"2021 წელს, როდესაც 20 ივნისის მოვლენების შემდეგ ოცნებამ პარლამენტში ამნისტიის კანონპროექტი მიიღო, მაშინ წინააღმდეგი მხოლოდ ჩვენი პოლიტიკური გუნდი იყო. გიორგი გახარია და ჩვენ ყოველთვის ვამბობდით, რომ ამ საქმეზე აუცილებელი იყო დამოუკიდებელი გამოძიების ჩატარება.

მიუკერძოებელმა გამოძიებამ უნდა უპასუხოს ორ მთავარ შეკითხვას: ვინ გასცა რეზინის ტყვიების გამოყენების ბრძანება გიორგი გახარიას გვერდის ავლით 20 ივნისს? ვინ დააორგანიზა და რა მიზნით მოხდა გავრილოვის საქართველოში ჩამოყვანა?

გამოძიება, რომელზეც ჩვენ ამდენს ვსაუბრობთ, აუცილებლად ჩატარდება, სამართლიანი და გავლენებისგან თავისუფალი სასამართლოს პირობებში. პასუხისმგებლობას კი ვერავინ გაექცევა — ყველას გაეცემა როგორც პოლიტიკური, ისე სამართლებრივი პასუხი," — წერს ტატა ხვედელიანი პოლიტიკოსი.

გიგა ფარულავა წერს, რომ ამ საქმეზე სრულყოფილი გამოძიება აუცილებლად უნდა ჩატარდეს, "ოღონდ არა ოცნების ხელისუფლების პირობებში".

"ვინმეს თუ ჰგონია, რომ ამ პასუხისმგებლობისგან გაძვრება ან დაიმალება, ძალიან ცდება. აუცილებლად დადგინდება: 1. ვინ გასცა რეზინის ტყვიების გამოყენების ბრძანება გახარიას გვერდის ავლით; 2. ვინ დააორგანიზა და რა მიზნით ჩამოიყვანა გავრილოვი საქართველოში", — წერს ფარულავა.

შალვა კერესელიძის განცხადებით, "საინტერესო ქრონოლოგიაა", რომ ქართულმა ოცნებამ მოვლენებიდან 6 წლის შემდეგ დაიწყო გამოძიება და "ასამართლებენ ადამიანს, რომელსაც რეზინის ტყვიების გამოყენებაზე ბრძანება არათუ არ გაუცია, არამედ ამის შესახებ მოგვიანებით შეიტყო".

"საინტერესო ქრონოლოგიაა: 2019 წელს გახარიას ხელმძღვანელობით შინაგან საქმეთა სამინისტრო აფიქსირებს პოზიციას, რომ სერგეი გავრილოვის საქართველოში შემოშვება არ შეიძლება. ამის მიუხედავად, პარტია ქართული ოცნება იღებს გადაწყვეტილებას, რომ გავრილოვი არათუ შემოუშვან, არამედ "შეცდომით" პარლამენტის თავმჯდომარის სავარძელში ჩასვან. მოქალაქეების გაბრაზების ფონზე გავრილოვის მასპინძელი, მაშინდელი პარლამენტის თავმჯდომარე ირაკლი კობახიძე გარბის ქვეყნიდან და იმალება ბაქოში, არადა საქართველოს მოქალაქეები სწორედ მისი თანამდებობიდან გადადგომას ითხოვენ. სიტუაცია იძაბება, პოლიცია და მომიტინგეების ნაწილი ერთმანეთს უპირისპირდებიან. მომიტინგეების და პოლიციის ნაწილი ფიზიკურად ზიანდებიან.

მოვლენებიდან 6 წლის შემდეგ იწყება გამოძიება და 6 წლის შემდეგ ასამართლებენ ადამიანს, რომელსაც რეზინის ტყვიების გამოყენებაზე ბრძანება არათუ არ გაუცია, არამედ ამის შესახებ მოგვიანებით შეიტყო.
ციტატა ივანიშვილის ბოლო საჯარო ინტერვიუდან: "დავუბრუნდები ჩემს მოუშუშებელ ჭრილობას — გახარიას... რა თქმა უნდა, მას გასამართლება მოუწევს. სასამართლოს დონეზე გვაქვს ყველა დოკუმენტი დალაგებული..." — წერს კერესელიძე.

მანამდე გიორგი შარაშიძემ დაწერა, რომ "20 ივნისის საქმე გახარიას წინააღმდეგ ბიძინა ივანიშვილის საჯაროდ დაანონსებული პოლიტიკური და პირადი შურისძიების აღსრულებაა". მისივე თქმით, "ოცნებამ ამ საქმის მასალების ნაწილს გრიფით საიდუმლო დაადო. მიუხედავად გახარიას ადვოკატის მოთხოვნისა, საქმის მასალები სრულად გასაჯაროებულიყო, პროკურატურა უარს აცხადებს. ნათელია, რომ ოცნებას აქვს დასამალი და ისმის კითხვა, რა აქვს დასამალი ოცნებას და ვის აფარებს ხელს?".

"სასამართლოს დონეზე გვაქვს ყველა დოკუმენტი დალაგებული. ისინი მკაცრ სასჯელს იმსახურებენ და გარწმუნებთ, რომ მიიღებენ კიდეც," – ბიძინა ივანიშვილი გახარიაზე, 2024.

ცხადია, 20 ივნისის საქმე გახარიას წინააღმდეგ არის ბიძინა ივანიშვილის საჯაროდ დაანონსებული პოლიტიკური და პირადი შურისძიების აღსრულება.

გახარიას ედავებიან ადამიანების დაზიანების ორგანიზებას, მაშინ, როდესაც 20 ივნისს ადამიანები დაზიანდნენ რეზინის ტყვიებით, ხოლო რეზინის ტყვიების გამოყენების ბრძანება გიორგი გახარიას არ გაუცია.

შეგახსენებთ, რომ ოცნებამ ამ საქმის მასალების ნაწილს გრიფით საიდუმლო დაადო. მიუხედავად გახარიას ადვოკატის მოთხოვნისა, საქმის მასალები სრულად გასაჯაროებულიყო, პროკურატურა უარს აცხადებს. ნათელია, რომ ოცნებას აქვს დასამალი და ისმის კითხვა, რა აქვს დასამალი ოცნებას და ვის აფარებს ხელს?", — წერს პარტია "გახარია საქართველოსთვის" წევრი გიორგი შარაშიძე.

შეგახსენებთ, 2025 წლის 12 ნოემბერს, პროკურატურამ გიორგი გახარიას მიმართ 20-21 ივნისის საქმეზე და ჩორჩანას ეპიზოდზე სისხლის სამართლის დევნა დაიწყო — უწყებამ ყოფილი პრემიერმინისტრისთვის აღმკვეთი ღონისძიების სახით პატიმრობას მოითხოვა. გენერალურმა პროკურორმა, გიორგი გვარაკიძემ ბრიფინგზე განაცხადა, რომ გახარიასთვის წაყენებული ბრალდებები 13 წლამდე პატიმრობას ითვალისწინებს.

გიორგი გახარია არ იმყოფება საქართველოში. ის ე.წ. ჩორჩანას ეპიზოდთან დაკავშირებით განმეორებით გამოსაკითხად წულუკიანის კომისიაში 23 ივნისს დაიბარეს, მაგრამ უცხოეთში ვიზიტის გამო გახარიამ კომისიას ონლაინ-ჩართვა შესთავაზა, რაზეც წულუკიანის კომისიამ თავიდან უარი განაცხადა, შემდეგ კი დასთანხმდა. მიმდინარე წლის 14 ივნისს კი ცნობილი გახდა, რომ პროკურატურამ დაიწყო გამოძიება "2019 წლის 24 აგვისტოს სოფელ ჩორჩანასთან საოკუპაციო ხაზის გასწვრივ შინაგან საქმეთა ყოფილი მინისტრის, გიორგი გახარიას მიერ განხორციელებული ქმედებას ეხება".