ახლახან გავრცელებული ინფორმაციით, Disney-მ რაპუნცელის ახალი ადაპტაციისთვის მთავარი როლის შემსრულებელი მსახიობები დაამტკიცა. სტუდიამ რაპუნცელის როლში ავსტრალიელი მსახიობი, ტიგან კროფტი, შეარჩია. შესაძლოა, ტიგანი Disney Channel-ის სატელევიზიო შოუდან — ზომბები — გეცნოთ. ხოლო თავდაჯერებული ქურდბაცაცა ფლინ რაიდერის როლს მილო მანჰეიმი მოირგებს.

ფოტო: Getty Images

ფილმის რეჟისორი მაიკლ გრეისია, რომლის ნამუშევრებს შორისაა მუსიკალური ბიოგრაფიული ფილმები Better Man და The Greatest Showman. როგორც ცნობილია, რაპუნცელის ანიმაციის მსგავსად, მუსიკალურ ელემენტებს ფილმშიც დიდი ადგილი დაეთმობა. სცენარის ავტორი კი ჯენიფერ რობინსონია, რომელიც ცნობილია ნამუშევრებით Do Revenge და Thor: Love and Thunder.

მსახიობების შერჩევის შესახებ გადაწყვეტილება Disney-მ ინსტაგრამის პოსტით გვაცნობა. ჯერჯერობით სხვა როლებზე მსახიობები ოფიციალურად არ დაუმტკიცებიათ. შემდეგი პერსონაჟი, რომლისთვისაც მსახიობის შერჩევა იგეგმება, დედა გოთელია.

შეგახსენებთ, რომ ანიმაციური ფილმი Tangled 2010 წელს გამოვიდა და დაახლოებით $582 მილიონი გამოიმუშავა. ანიმაციამ გრემის ჯილდო მოიპოვა სიმღერისთვის I See the Light, რომელმაც ასევე მიიღო ნომინაცია საუკეთესო ორიგინალური სიმღერის კატეგორიაში ოსკარის რიგით 83-ე დაჯილდოებაზე. ანიმაციიდან სხვა პოპულარული სიმღერებია: When Will My Life Begin?, Mother Knows Best და I’ve Got a Dream. ზუსტად როდის იხილავს მაყურებელი ახალ ფილმს რაპუნცელის შესახებ, ჯერჯერობით უცნობია.