2026 წლის Emmy Awards-ს ახალი კატეგორია ემატება — Legacy Award, ანუ მემკვიდრეობის ჯილდო იმ სერიალებს მიენიჭება, რომლებმაც ტელევიზიის ისტორიაში გრძელვადიანი კულტურული და შემოქმედებითი კვალი დატოვეს.

ეს Emmy-ის პირველი მსხვილი ახალი კატეგორიაა თითქმის ორი ათწლეულის განმავლობაში და მისი მთავარი იდეა წლიური შეფასებისგან განსხვავდება: აქ ყურადღება გამახვილებულია არა კონკრეტულ სეზონზე, არამედ სერიალის ისტორიულ მნიშვნელობასა და გავლენაზე.

რას აფასებს მემკვიდრეობის ჯილდო

Television Academy-ის მიხედვით, კატეგორიაში მონაწილეობის მისაღებად სერიალს უნდა ჰქონდეს მინიმუმ ხუთი სეზონი და დაახლოებით 60 ეპიზოდი. თუმცა ფორმალური კრიტერიუმები მხოლოდ ერთი ნაწილია, მთავარი საზომი ისაა, როგორ შეცვალა სერიალმა ტელევიზიის ენა, ჟანრი ან მაყურებლის მოლოდინი.

ფოტო: Variety

"მემკვიდრეობის ჯილდო ინოვაციურ სატელევიზიო პროგრამებს ეძღვნება, იმ პროექტებს, რომლებმაც დროს გაუძლეს, მოგვითხრეს ისტორიები, რომლებიც დღესაც იზიდავს მაყურებელს და შექმნეს საკულტო, დროის მიღმა არსებული პერსონაჟები, მრავალთაობიანი მიმზიდველობით", — განაცხადა Television Academy-ის თავმჯდომარემ, კრის აბრეგომ.

"ეს ჯილდო აკადემიას საშუალებას აძლევს, უფრო ფართოდ აღნიშნოს ტელევიზიის მდიდარი ისტორია და დააფასოს ის მთხრობელები, რომელთა ნამუშევრებმა მაყურებელთან ძლიერი რეზონანსი შექმნა და დღემდე აგრძელებს მილიონობით გულშემატკივრის გართობას მსოფლიოს მასშტაბით".

რომელი სერიალები მიიჩნევა ყველაზე რეალურ კანდიდატებად

ოფიციალური ნომინანტები ჯერ გამოცხადებული არ არის, თუმცა კრიტიკოსებისთვის გარკვეული სახელები თითქმის შეუცვლელია.

ყველაზე ხშირად სახელდება The Sopranos, სერიალი, რომელიც თანამედროვე სატელევიზიო დრამის საწყის წერტილად ითვლება და ანტი-გმირის ფორმატი დაამკვიდრა. არანაკლებ მნიშვნელოვანია The Wire, რომელიც ტელევიზიას სოციალური ანალიზის ინსტრუმენტად აქცევს და დღემდე ერთ-ერთ ყველაზე გავლენიან ნამუშევრად რჩება.

კანდიდატთა შორის ხშირად მოიხსენიება Game of Thrones-იც, გლობალური ფენომენი, რომელმაც ფანტასტიკის ჟანრი სატელევიზიო მეინსტრიმის ცენტრში მოაქცია. მიუხედავად ფინალის მიმართ არსებული კრიტიკისა, მისი მასშტაბი და გავლენა თანამედროვე ტელევიზიაზე სადავო აღარ არის.

ამავე კონტექსტში განიხილებიან ისეთი სერიალებიც, როგორებიცაა The Simpsons, Friends და Breaking Bad, პროექტები, რომლებმაც თაობები განსაზღვრეს და ტელევიზიის კულტურული სტატუსი შეცვალეს. კრიტიკოსების ნაწილი შესაძლო კანდიდატად Lost-საც ასახელებს, სერიალს, რომელმაც ტელევიზიის გარშემო ონლაინ დისკუსიისა და ფან-თეორიების კულტურა პრაქტიკულად შექმნა.

როდის გაიმართება დაჯილდოება?

78-ე Primetime Emmy Awards-ის ნომინანტები 2026 წლის ზაფხულში გამოცხადდება. ჯერჯერობით უცნობია, რომელ ღონისძიებაზე გადაეცემათ მემკვიდრეობის ჯილდო, მთავარ ცერემონიაზე თუ Television Academy-ს ცალკე ფორმატში.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…