ერაყის მინისტრთა კაბინეტმა მსოფლიოში ერთ-ერთ უდიდესი, დასავლეთ Qurna 2-ის ნავთობსაბადოს ნაციონალიზაციის გეგმა დაამტკიცა, რომლის 75%-იანი წილის მფლობელი აშშ-ს მიერ სანქცირებულ Lukoil-ია.

Reuters წერს, რომ კაბინეტმა გადაწყვეტილება იმ მიზნით მიიღო, რომ თავიდან აიცილოს შესაძლო შეფერხებები, რომლებიც რუსული კომპანია Lukoil-ის მიმართ აშშ-ის მიერ დაწესებულ სანქციებს უკავშირდება.

Reuters-ის ინფორმაციით, სახელმწიფო კომპანია Basra Oil Company ნავთობსაბადოს ოპერირებას 12 თვის განმავლობაში გადაიბარებს. ამის შესახებ საინფორმაციო სააგენტოს კომპანიაში დასაქმებულმა ორმა ოფიციალურმა პირმა განუცხადა.

"ჩვენი მიზანია წარმოება შეუფერხებლად გაგრძელდეს, მაშინ როცა ერაყი აშშ-ის სანქციებთან დაკავშირებულ გაურკვევლობას უმკლავდება. ამ 12-თვიან პერიოდში ასევე მოვიძიებთ პოტენციურ მყიდველებს Lukoil-ის წილისთვის," — განაცხადა Basra Oil Company-ის ერთ-ერთმა წარმომადგენელმა.

Lukoil-მა ნოემბერში დასავლეთ Qurna 2-ზე ფორსმაჟორი მას შემდეგ გამოაცხადა, რაც კომპანია, რუსულ ნავთობმწარმოებელ Rosneft-თან ერთად, სანქციების ქვეშ მოექცა. ეს სანქციები აშშ-ის პრეზიდენტ დონალდ ტრამპის პოლიტიკის ნაწილი იყო, რომელიც უკრაინაში ომის დასრულებას ისახავდა მიზნად.

დასავლეთ Qurna 2-ზე Lukoil-ს 75%-იანი ოპერაციული წილი ჰქონდა, რაც კომპანიის ყველაზე მსხვილი უცხოური აქტივი იყო. აშშ-ის მიერ დაწესებული ბოლო ვადის მიხედვით, კომპანიას საზღვარგარეთული აქტივების გასაყიდად დრო 17 იანვრამდე აქვს.

აღნიშნული ნავთობსაბადო გლობალური ნავთობის მიწოდების დაახლოებით 0.5%-ს და ერაყის წარმოების დაახლოებით 9%-ს უზრუნველყოფს. ერაყი OPEC-ის ფარგლებში ნავთობის წარმოებით მეორე ადგილზეა საუდის არაბეთის შემდეგ.

შეგახსენებთ, რომ 2025 წლის 22 ოქტომბერს აშშ-ის ფინანსთა სამინისტროს უცხოური აქტივების კონტროლის ოფისმა (OFAC) "რუსნეფტი" და "ლუკოილი" დაასანქცირა.