2025 წლის ივლისში ცნობილი მუსიკოსი შონ "დიდი" ქომბსი ქალების პროსტიტუციისათვის ტრანსპორტირების ორგანიზებაში დამნაშავედ ცნეს. რეპერს სასამართლომ 50-თვიანი პატიმრობა მიუსაჯა, რომლის ვადაც 2028 წლის მაისში ამოიწურება.

იხილეთ: "დიდის" განაჩენი ცნობილია — რეპერმა სამი ყველაზე მძიმე ბრალდება აიცილა

აშშ-ს პრეზიდენტ დონალდ ტრამპის განცხადებით, ცნობილი გახდა, რომ მომღერალმა სასჯელისთვის თავის არიდება სცადა. ტრამპის თქმით, ქომბსმა პრეზიდენტს წერილი გაუგზავნა, რომელშიც შეწყალება სთხოვა. თუმცა, აშშ-ს პრეზიდენტი მის შეწყალებას არ აპირებს.

ტრამპის გამოსვლებიდან ცნობილია, რომ მას "დიდის" მიმართ წარსულში საკმაოდ კარგი დამოკიდებულება ჰქონდა და 2012 წელს მეგობრადაც კი მოიხსენიებდა. თუმცა, მას შემდეგ, რაც 2016 წელს პრეზიდენტობის კანდიდატად იყარა კენჭი, მათი ურთიერთობა გაფუჭდა, რადგან ქომბსმა ტრამპის მიმართ უსიამოვნო კომენტარები გააკეთა.

დონალდ ტრამპი და "დიდი"

დონალდ ტრამპი და "დიდი"

ფოტო: Johnny Nunez/WireImage/Getty Images

ამის მიუხედავად, პრეზიდენტმა წარსულში აღნიშნა, რომ შეწყალების შესახებ გადაწყვეტილების მიღებისას პირად დამოკიდებულებას არ მიაქცევდა ყურადღებას:

მხოლოდ ფაქტებს შევხედავ. თუ ვფიქრობ, რომ ვიღაცას არასწორად მოექცნენ, არ აქვს მნიშვნელობა, ამ ვიღაცას მოვწონვარ თუ არა

მხოლოდ ფაქტები გაითვალისწინა დონალდ ტრამპმა თუ თავისი ცუდი ურთიერთობაც "დიდისთან", არ ვიცით, თუმცა მან აშკარად განაცხადა, რომ მომღერალი პრეზიდენტისგან შეწყალებას არ მიიღებს.