აშშ-ის პრეზიდენტმა დონალდ ტრამპმა უნგრეთის პრემიერმინისტრ ვიქტორ ორბანს წერილი გაუგზავნა და საარჩევნო კამპანიაში წარმატება უსურვა. ამის შესახებ ორბანმა საკუთარ Facebook-ზე დაწერა და ფოტოც გამოაქვეყნა.

Reuters-ის ინფორმაციით, ორი ლიდერი თეთრ სახლში 7 ნოემბერს შეხვდა. ორბანის თქმით, ამ შეხვედრისას რუსეთის ენერგეტიკულ სექტორზე დაწესებული ამერიკულ სანქციებთან დაკავშირებით, ტრამპმა უნგრეთთან მიმართებით ერთწლიანი "გამონაკლისი" დაუშვა.

წერილში ტრამპმა აღნიშნა, რომ ორბანის "გამბედავი ლიდერობა" დანარჩენი მსოფლიოსთვის სამაგალითოა. მან ასევე მზადყოფნა გამოთქვა "თანამშრომლობის გაღრმავების" შესახებ თავდაცვის, ენერგეტიკისა და არალეგალური მიგრაციის მიმართულებით.

"თქვენ ყოველთვის მტკიცედ იცავდით იმ პრინციპებს, რომლებიც უნგრეთს ასეთ შესანიშნავ ქვეყანად აქცევს — რწმენას, ოჯახს და სუვერენიტეტს," — წერს ტრამპი 10 დეკემბრით დათარიღებულ წერილში.

წერილში ტრამპმა ასევე მადლობა გადაუხადა ორბანს უნგრეთში მოწვევისთვის და აღნიშნა, რომ მისი გუნდი ვიზიტის გრაფიკთან დაკავშირებით "კავშირზე გამოვა". ორშაბათს ორბანმა განაცხადა, რომ არჩევნებამდე უნგრეთს შესაძლოა "მაღალი რანგის" ამერიკელი პოლიტიკოსი ეწვიოს.