საქართველოს პროფკავშირების გაერთიანების კვლევის მიხედვით, 5 აპრილს მინდელის სახელობის შახტაში 6 მაღაროელის გარდაცვალებისა და დაშავების საქმეში უფრო მეტად არა ბუნებრივი, არამედ ადამიანური გადაცდომის შესაძლებლობები იკვეთება.

"დასკვნის შედეგად შეიძლება დასკვნების გაკეთება იმის შესახებ, რომ 2018 წლის 5 აპრილს მომხდარი უბედური შემთხვევის მიზეზები არ უნდა ვეძებოთ სამთო დარტყმასა და სხვა ბუნებრივ მოვლენებში, არამედ უფრო მეტად იკვეთება ადამიანური გადაცდომის შესაძლებლობები ნახშირმოპოვებითი უბნის მომზადების, სავენტილაციო და შრომის უსაფრთხოების სისტემის გამართვის, შრომის ორგანიზების, საამფეთქებლო სამუშაოების წარმოების და ა. შ. პროცესებში", - ვკითხულობთ პროფკავშირების მიერ გავრცელებულ განცხადებაში.

პროფკავშირების გაერთიანება გამოძიებას იმის გარკვევისკენაც მოუწოდებს, მექანიკური დაზიანებების გარდა არსებობს თუ არა გარდაცვლილების სხეულზე სხვა კვალი.

"ის ფაქტი, გარდაცვლილებს აღენიშნებათ მხოლოდ მექანიკური დაზიანებები თუ ამასთან ერთად აქვთ დამწვრობის კვალიც, საგრძნობლად დაავიწროებს მომხდარის სავარაუდო ვერსიების რაოდენობას", - წერია განცხადებაში.

გაერთიანების თქმით, ნახშირის მომპოვებელ შახტებზე კონტროლის გამართული მექანიზმის არსებობა აუცილებელია და გამოსავალია არა საწარმოს დახურვა, არამედ უსაფრთხოების სისტემის გამართვა, რაზე მზადყოფნაც უკვე გამოითქვა. ისინი საჭიროდ მიიჩნევენ უცხოური პრაქტიკის გაზიარებასა და ე.წ. "მეხსიერების მყარი ყუთების" დამონტაჟებასაც, რათა შემთხვევის ადგილიდან ზუსტი ინფორმაციის მიღება გახდეს შესაძლებელი.

პროფკავშირები მოითხოვს ნახშირისა და მარგანეცის მოპოვებაზე დასაქმებული ადამიანების შრომითი უსაფრთხოების ნორმების გამკაცრებას, საპენსიო ასაკის 55 წლამდე დაწვას, საშემოსავლო გადასახდების გაუქმებას, საკომპენსაციო სისტემის დანერგვასა და კონკრეტული შემთხვევებისთვის დაზღვევის სისტემის შემოღებას.

ტყიბულში, მინდელის სახელობის შახტში 6 მუშა დაიღუპა, 3 დაშავდა. გამოძიების ინფორმაციით, შახტის ერთ-ერთ გვირაბში მოხდა კედლების დეფორმაცია, რასაც ჭერის ჩამოშლა მოჰყვა.