ალ-ჯაზირას ხუთი ჟურნალისტი, მათ შორის ცნობილი რეპორტიორი, ანას ალ-შარიფი, დაიღუპა ისრაელის მიზანმიმართული იერიშის შედეგად ღაზაში მდებარე ალ-შიფას საავადმყოფოს მახლობლად.

შარიფი და კიდევ ერთი კორესპონდენტი, მოჰამედ ქრეიქე, ოპერატორებთან — იბრაჰიმ ზაჰერთან, მოჰამედ ნოუფალთან და მოამენ ალივასთან ერთად — ჟურნალისტებისთვის განკუთვნილ კარავში იმყოფებოდნენ საავადმყოფოს მთავარ კარიბჭესთან, როდესაც დარტყმა განხორციელდა, — განაცხადა ალ-ჯაზირამ.

"კვირას მომხდარი "მიზანმიმართული მკვლ

ელობა" იყო "კიდევ ერთი აშკარა და წინასწარ დაგეგმილი თავდასხმა პრესის თავისუფლებაზე", — ნათქვამია მაუწყებლის განცხადებაში.

მომხდარზე კომენტარი ჟურნალისტთა დაცვის კომიტეტმა (CPJ) გააკეთა და აღნიშნა, რომ საზოგადოება შეძრწუნებულია თავდასხმით.

ისრაელის თავდაცვის ძალებმა (IDF) დაადასტურეს, რომ მიზანში ჰყავდათ შარიფი, რადგან, მათი თქმით, ის "ჰამასის ტერორისტული უჯრედის ხელმძღვანელი" იყო.

IDF ასევე აცხადებს, რომ მან "განახორციელა სარაკეტო შეტევები ისრაელის სამოქალაქო მოსახლეობაზე და IDF-ის ჯარებზე" და რომ ორგანიზაციამ მოიპოვა ჰამასის დოკუმენტები, რომლებიც მიუთითებს, რომ 2019 წელს შარიფი ჯგუფის ერთ-ერთ დანაყოფში იყო.

თუმცა CPJ აცხადებს, რომ ისრაელმა ვერ წარმოადგინა მტკიცებულება, რომელიც ამ ბრალდებებს გაამყარებდა — "ეს არის ნიმუში, რომელიც არამხოლოდ მიმდინარე ომში, არამედ წინა ათწლეულებშიც გვინახავს: როგორც წესი, ჟურნალისტს კლავენ ისრაელის ძალები, შემდეგ კი აცხადებენ, რომ ის ტერორისტია, თუმცა ამტკიცებენ ამას ძალიან მცირე მტკიცებულებით," — განუცხადა BBC-ს CPJ-ის ხელმძღვანელმა, ჯოდი გინსბერგმა.

ალ-ჯაზირას მთავარმა რედაქტორმა, მოჰამედ მოავადმა BBC-ს უთხრა, რომ შარიფი აკრედიტებული ჟურნალისტი იყო და "ერთადერთი ხმა", რომლის მეშვეობითაც მსოფლიოს შეეძლო გაეგო, რა ხდებოდა ღაზის სექტორში.

ომის განმავლობაში ისრაელი საერთაშორისო ჟურნალისტებს ღაზაში თავისუფლად მუშაობის შესაძლებლობას არ აძლევს, რის გამოც ბევრი მედიასაშუალება ეყრდნობა ადგილობრივ რეპორტიორებს.

"ისინი საკუთარ კარავში იყვნენ, და არა ფრონტის ხაზზე,"— თქვა მოავადმა ისრაელის დარტყმის შესახებ.

"ფაქტია, რომ ისრაელის მთავრობა ცდილობს ჩაახშოს ნებისმიერი სახის გაშუქება ღაზის შიგნიდან," — აღნიშნა მან The Newsroom-ის ეთერში — "ასეთი რამ თანამედროვე ისტორიაში არ მინახავს."

Al Jazeera English-ის დირექტორმა, სალაჰ ნეგმმა BBC-ის Newsday-ის განყოფილებას უთხრა, რომ ალ-ჯაზირამ კარგად იცის თავისი ჟურნალისტების წარსული და კვალიფიკაცია, იცის "რა პროდუქტს გვაწვდიან და მას რამდენიმე წყაროს მიხედვით ვამოწმებთ, მათ შორის იმას, რასაც თქვენ აშუქებთ BBC-ში."

გასულ თვეში, ალ-ჯაზირას მედია ქსელმა — გაეროსა და CPJ-სთან ერთად — განცხადებები გაავრცელა, სადაც საზოგადოებას აფრთხილებდნენ, რომ შარიფის სიცოცხლეს საფრთხე ემუქრებოდა და მოითხოვდნენ მის დაცვას.

IDF-ის სპიკერმა, ავიხაი ადრაემ ივლისში X-ზე შარიფის ვიდეო გამოაქვეყნა და იგი ჰამასის სამხედრო ფრთის წევრობაში დაადანაშაულა.

გაეროს სპეციალურმა რაპორტიორმა გამოხატვის თავისუფლების საკითხებში, ირინე ხანმა, ამ ბრალდებას "დაუმტკიცებელი" და "ჟურნალისტებზე აშკარა თავდასხმა" უწოდა.

მაშინ მან აღნიშნა, რომ "იზრდება მტკიცებულებები, რომლებიც მიუთითებს, რომ ისრაელის არმიამ ღაზაში ჟურნალისტები მიზანმიმართულად მოკლა დაუსაბუთებელი ბრალდებით, რომ ისინი ჰამასის ტერორისტები იყვნენ."

ბოლო განცხადებაში IDF-მა თქვა, რომ შარიფი ჟურნალისტის ვინაობით ინიღბებოდა და ადრე უკვე "გაუმჟღავნებიათ დაზვერვის მონაცემები", რომლებიც მის სამხედრო კავშირზე მიუთითებდა, მათ შორის "ტერორისტული წვრთნების კურსების სიები."

ეს არ არის პირველი შემთხვევა, როცა IDF-მა ღაზაში ალ-ჯაზირას ჟურნალისტები მოკლა ჰამასთან კავშირის ბრალდებით — გასული წლის აგვისტოში ისმაელ ალ-ღული საჰაერო იერიშს ემსხვერპლა, როდესაც მანქანაში იჯდა — სოციალურ მედიაში გავრცელებულ შემზარავ ვიდეოში მისი მოკვეთილი თავი ჩანდა. ასევე დაიღუპა ოპერატორი რამის ალ-რიფი.

ალ-ღულის შემთხვევაში IDF-მა თქვა, რომ ის 2023 წლის 7 ოქტომბრის ჰამასის შეტევებში მონაწილეობდა, რაც ალ-ჯაზირამ კატეგორიულად უარყო.

CPJ-ის ცნობით, 2023 წლის ოქტომბერში ღაზაში ისრაელის სამხედრო ოპერაციის დაწყებიდან დღემდე 186 ჟურნალისტის სიკვდილი დადასტურდა.